近期中國網絡走紅咗一批「虛擬外賣」遊戲 App，仲有外國嘅「食物永遠不會來」，同國內開發者嘅「點了嗎」「飯沒來」「貪貓外賣」等，都係同一套路。呢啲 App 可以完整模擬真實外賣全流程：選餐、加料、計卡路里、付款，仲可以睇到騎手取餐、送餐嘅進度；但係呢張單，永遠都唔會送到。
有博主試完話，呢啲 App 跟普通外賣平台「一致」，各種風格嘅美食都有，連點漢堡加唔加洋葱、生菜都要揀。佢哋大多由個人開發，亦有大型互聯網企業參與。一位開發者解釋自己點寫出嚟：「想點外賣嘅時候其實唔係餓，就係有種想補償自己嘅衝動，給自己一點時間就過去咗；呢個小工具等同先騙咗自己嘅大腦，話外賣已經喺路上，等假外賣『送到』，衝動就過去。」另一位用户講得透徹：「佢圖嘅就係呢個過程本身。」
國家二級心理諮詢師史宇指，呢種滿足嘅唔係食慾，而係消費過程，對看重過程嘅人，等同一次幾乎零成本嘅「延遲滿足」練習；但對「只看結果」嘅人，佢話「唔好用，甚至可能會有部分傷害」——「就係一隻靴子冇落地嘅痛苦」。
真金白銀嘅問題就嚟。大部分 App 唔使真錢，但「貪貓外賣」可以真實付款，存入「貪貓錢罐」，隨時零手續費提現，冇利息。北京郵電大學互聯網治理與法律研究中心主任謝永江指，資金層面本質係持牌支付機構提供嘅記帳工具，帳户資金屬預付款／備付金，平台唔可以挪用；但又須同時遵循資金監管（唔承諾利息、收益、增值回報）同遊戲監管（上線備案、未成年人保護、唔誘導大額非理性消費、唔搞抽獎競猜下注）兩套規則。
法律問題專家薛政補充，遊戲營運方若持有支付業務許可證，通常較安全；若無牌照卻用自身帳户接收用户資金，就係無證經營金融業務，違法，資金風險高，付款過程仲有支付信息洩露風險。佢亦提醒，部分 App 會索取定位、相冊、通訊錄權限，仲支持導入真實地址，建議唔好填寫真實姓名地址；又有每日打卡領優惠券、使用時長解鎖稀有菜式等獎勵機制，對未成年人尤其要留意誘導沉迷。
姣姐講多句：「點喇嘛但唔使食」呢個概念，聽落好有道理，但實情係「點喇嘛唔使食，仲要畀錢，仲要畀定位」，就唔係咁搞笑喇。
黃姣姐整合｜頂硬上
