陳書君（Vincent）10月1日喺社交平台上載兩張同未婚夫Steven一齊試穿中式馬褂嘅合照。一藍一紅、繡住金龍嘅傳統禮服，兩人雙雙將手放喺背後，對住鏡頭笑。佢喺帖文寫低「原來我們真的要結婚了」，透露婚禮籌備進度。
作為前有線新聞首席男主播，陳書君今年5月離巢，人生翻開新頁。佢同Steven拍拖6年，今年1月正式訂婚。佢日前喺Threads公開，兩人計劃喺明年9月喺加拿大註冊結婚，仲大方為對方正名，講明Steven係佢嘅「男朋友」同「未婚夫」，請外界唔好再以「同性密友」形容兩人關係。
不過呢份幸福嚟之不易。陳書君早喺自家YouTube頻道自述，14年前向父母講明自己性取向，當時收到嘅係生母情緒失控嘅痛罵：「你不如死咗去算啦。」對方更曾揚言到寓所附近嘅鐵路橋跳橋。面對以死相逼，佢當年沒有退讓，拒絕為迎合家人而騙婚，並表明自己絕唔會為咗滿足家人嘅期望，而去欺騙一個女仔、傷害兩個家庭。
姣姐講多句：由14年前出櫃被生母以死相逼，到而家可以大大方方着馬褂、喺社交平台為愛人正名，陳書君呢條路走得真係唔容易。「先註冊、後擺酒」嘅務實進度條，本身就係最真摯嘅承諾。人哋點樣定義愛、點樣追求幸福，我哋尊重佢哋自己。
黃姣姐整合｜頂硬上
