《東張西望》2026年10月3日播出報道，揭出一名入行超過四十年、常在螢幕上飾演悍匪惡霸嘅資深綠葉演員（疑為劉文俊），被苦主指控拖欠 72,000 港元演唱會門票費，一拖就係兩年幾。
2023年，苦主霍先生向呢位前輩訂購 50 張演唱會門票，一次過轉賬 72,000 港元。錢交咗，對方話提供唔到門票，承諾全數退款，但呢筆錢一拖就拖咗兩年多。霍先生話期間多次聯絡對方，近三個月「十次有七次都無人接聽，要不就是一接通就匆匆掛斷」；佢甚至願意先收 20,000 元了事，都俾拒絕，最後唯有向節目投訴。
節目組接到投訴，主持用私人電話致電，一直揾唔到人；改撥電視台公務電話，劉文俊先至接聽。佢喺電話入面稱自己一直有陸續還款，話「剛才我已經跟霍先生談妥了，承諾會在10號之前把事情解決好」。被追問會唔會一次過歸還全數 72,000 元，佢答：「不是隻還2萬，我會全數安排退給他。」
最耐人尋味嘅，係佢反而抱怨節目將事件公開對佢個人名譽「極不公平」，更反問主持：「如果我有心逃避、想『潛水』的話，又怎麼會接你們電話呢？」呢個反問，配上佢之前用私人電話一直唔接嘅紀錄，確實令人語塞。
節目播出後，社交平台討論熱烈。網民調侃：「這次真的是戲如人生，銀幕上下都將反派演得淋漓盡致」；亦有網民指，拖咗兩年半先話會還，「如果不是被媒體曝光，這筆錢大概永遠也拿不回來」。亦有不少觀眾讚節目介入「快、準、狠」。
最新進展，霍先生已確認收返全部欠款，呢場歷時兩年幾嘅風波終有結果。
姣姐講多句：戲入面演惡人冇問題，但收錢唔買單、拖人兩年，就係「戲如人生」都救唔返嘅嘢。私人電話唔接、公電先接，呢個反差夠寫一篇專欄。最緊要係苦主收返錢，呢個先係真正嘅「大團圓」。
黃姣姐整合｜頂硬上
