成人題材｜18+
英國嘅新色情管製法今日起（11 月 6 日）正式落地，三類被形容為「正常化」嘅色情內容成咗刑事罪。呢套法例係《犯罪及警務法》（Crime and Policing Act）一部份，政府今年早前已經公佈，違反者將面臨不等刑罰。
根據新法，以下三類內容，由擁有至發布，由今日起全部違法：一，色情片入面出現勒頸（strangulation）或窒息（suffocation）；二，色情片入面出現血緣親屬之間，或佯裝為親屬之間嘅性行為；三，成年人佯裝為少於 16 歲兒童，或涉及此類角色嘅性行為。
刑罰分兩級：擁有或發布入面有勒頸、窒息或親屬間性交嘅色情內容，最高可判兩年監禁；而涉及成年人扮演 16 歲以下兒童嘅色情內容，最高刑期為三年。
英國「受害者及打擊對女性及女童暴力」主管大臣 Alex Davies-Jones 喺今年早前公佈禁令時表示，呢項法例係落實政府「十年內將針對女性及女童嘅暴力減半」承諾嘅一部份，並強調「呢件事唔係要把無害嘅性偏好刑事化」，但稱色情會影響大眾對「健康關係」嘅認知，特別係年輕人。
資料圖片：Pixabay
「任何將針對女性暴力正常化，甚至美化暴力嘅內容，都係危險嘅，會模糊現實生活中可以接受嘅界限。」她話。
今月生效嘅法例出自上議院議員 Gabby Bertin 於 2025 年完成嘅色情管製檢討。她喺報告中指出，呢類色情「對現實世界有毀滅性影響」，並引用 Pornhub 數據，2024 年全平台有 41 億次瀏覽涉及亂倫情節，強調業界長期「完全缺乏政府監督」。
Bertin 表示：「起用呢類罪項係非常好嘅消息，亦已遲咗好多。法例加上更好執行與更強監管，會向提供及促進色情嘅公司，以及整個社會，明確發出訊號：鼓勵對現實造成傷害嘅極端暴力內容，係唔被接受嘅。」
研究方面，「勒頸應對研究所」（Institute for Addressing Strangulation）2024 年一項研究發現，超過三分之一 16 至 34 歲成年人曾經喺合意性行為期間被勒頸或窒息；同組 2025 年調查更發現，43% 有性生活嘅 16 至 17 歲受訪者表示自己曾遭受同樣對待。
阿頂有嘢講：成人產業由「零監管」跳到「刑事化」，一步跨成刑事罪，唔少業內人士同自由派早已有爭議。有無效果、點執法、邊界點劃，俾住睇。
阿頂整合｜頂硬上
