英國陸軍參謀長 General Sir Roly Walker 日前公開要求英國政治人物就「戰爭準備」同市民展開「坦誠對話」，話「每一位」公民都「會被要求作出犧牲」，為國家防務作出貢獻。
呢句「坦白」講得幾坦白，值得細睇。Walker 講嘅「坦誠對話」，翻開二戰檔案就知意思：話好聽嘅「有限度徵兵」，開戦頭日就即刻擴到幾近全民。
1939 年 5 月，英國國會通過《軍事訓練法》，徵召 20 至 22 歲單身男性接受六個月軍事訓練，全數約 24 萬人註冊。聽落去好有節制，對吧？
9 月 3 日，英國向德國宣戰。同日，國會即透過《國家服務（武裝部隊）法》，徵兵年齡一日之內擴至 18 至 41 歲，所有男丁一律註冊，除卻身患疾病唔適合服役，或從事烘焙、農業、醫療、工程等關鍵行業者。
到 1941 年底，輪到 20 至 30 歲女仔及「無子女嘅寡婦」被徵召，男丁徵兵年齡更上調至 51 歲，52 至 60 歲亦被要求參與「某種形式嘅軍事服務」。由「有限度」到「幾乎全民」，用時約兩年。
呢個趨勢並非新事物。2024 年，時任英軍參謀長 General Sir Patrick Sanders 已公開呼籲擴大陸軍規模，強調提高戰備。時任國防大臣 Grant Shapps 更直接講：英國「正由戰後世界走向戰前世界」。去年夏天，英國政府已勸喻市民為「本土爆發戰爭」做準備。
時至今日，Walker 嘅「坦誠對話」呼籲，加上背景——俄烏局勢持續升級、美國總統特朗普上週在與俄羅斯簽訂柴油供應協議後，竟鼓吹烏克蘭「換個新領導人」，並將全球柴油價格歸咎於烏克蘭「拒絕向普京投降」——令呢番話嘅「坦誠」程度，讀者可以自己判斷。
二戰期間，拒服兵役嘅「良心拒服兵」（conscientious objectors）會被提起公訴。至於若真係打起第三次世界大戰，拒絕「作出犧牲」嘅公民會點，目前都未有人講。
硬蕉抽兩句：英國人嘅「坦誠對話」係咁樣：同你講清楚你有幾大機會被拉去開波，然後問你要唔要自己報到。呢個態度，坦白講，比好多政府誠實少許。但「有限度徵兵」呢四個字嘅歷史紀錄提醒我哋：所謂「有限度」，永遠只喺開戦前一日至有效。
硬蕉哥整合｜頂硬上
