TVB 正式宣佈與內地大型短劇平台「紅果短劇」達成戰略夥伴關係，進軍豎屏短劇市場。雙方首部重頭合作，正正係經典宮鬥劇《金枝慾孽》嘅番外篇——《金枝慾孽之宮牆折柳》，今日（10月16日）喺橫店明清宮苑搞開機儀式。
最大嘅驚喜（定係驚嚇？）係「視帝」陳豪時隔多年再穿清裝，以經典角色「孔武」現身。呢個係佢時隔 22 年再扮清裝角色。陳豪自己笑言：「隔咗咁多年再做孔武，感覺好熟悉，但拍豎屏劇嘅節奏同演繹方式好新鮮，對我嚟講係一個新挑戰。」
除咗陳豪，劇組仲請到陳自瑤、龔嘉欣、鄭子誠等實力派演員坐鎮；男女主角則由內地短劇演員趙夕汐及阮浩棕擔正，並聯同新生代演員倪嘉雯共同主演。開機儀式上，一眾新老演員仲即興重演原版多個經典名場面，「火花十足」。
TVB 戲劇部助理總監文偉鴻表示，雖然今次係豎屏及短篇幅，但製作團隊會「完全沿用傳統重頭劇嘅嚴謹規格與高質量要求」，力爭喺快節奏嘅短劇市場突圍。
消息一出，網民反應兩極。一方痛心：「文偉鴻居然都要淪落至拍短劇，視帝視后都要淪落至拍短劇！」、「陳豪而家都開始拍短劇咗？」、「點解要咁對陳豪？」、「TVB 演員去短劇市場真係太浪費喇。」
但另一方都話：「有人睇自然有得拍，而家冇正劇拍因為根本就冇幾多人睇。時代變化，市場選擇。」
姣姐講多句：視帝時隔 22 年再演同一角色，仲要將神作《金枝慾孽》改成短劇，呢個反差真係好抵玩。但「淪落」呢個詞又冇咁簡單：當正劇市場縮細，藝人跟住市場走，究竟係「大材小用」定係「順應潮流」，真係見仁見智。短劇版究竟係「大材小用」定係「另闢蹊徑」，要等佢出街先見到真章。
