無綫電視新劇《璀璨之城》10月12日晚首播，由張智霖、吳卓羲、高海寧、張曦雯、姜大衞、江美儀、蔡一智、陳瀅、龔慈恩、陳煒等主演，陳維冠監製。劇集以澳門豪門為背景，講一對兄弟自幼因爭權而日夜惡鬥，隨家族版圖擴張，鬥爭更趨白熱化。
最矚目係張智霖同吳卓羲呢對組合。二人繼2012年《衝上雲霄II》後相隔13年再合演TVB劇，而且都闊別逾十年再接拍無綫劇集。張智霖飾澳門豪門大少官孝賢，係權力信仰者，表面温文爾雅，內裏城府甚深，因童年陰影及渴望被愛落空，逐漸走火入魔。
張智霖坦言官孝賢係「從影以嚟未試過咁邪惡」嘅角色：「Cool魔今次真係成魔喇，官孝賢係壞事做盡。」吳卓羲飾二少官孝君，向來有「衝動王」之稱，今次卻改演穩重富家子弟，他笑言：「今次我唔玩衝動，我淨係玩手段。」
談到再次合作，吳卓羲話知道對手係張智霖後即答應接拍，想睇嚇有冇新火花。張智霖讚吳卓羲係「好好嘅演員，好準時、好幽默、好放鬆」，每次對戲有唔同睇法都容易攞到共識。張智霖總結呢對兄弟：「鬥嘅時候好無情，但因為佢哋係兩兄弟，有時又會幾有義，無情有義你睇過未？」
姣姐講多句：13年再合作、張智霖自稱演最邪惡角色、吳卓羲由「衝動王」變穩重富少，角色反差本身就係好大賣點。兩個老友點樣演一對無情有義嘅兄弟，10月12日見分曉。
黃姣姐整合｜頂硬上
