十月六號黃昏近六時，屯門公園外屯門鄉事會路巴士站，一班下班潮喺度排長龍。就喺呢個節骨眼，一輛紫色私家車竟然騎線停喺巴士站位，慢騰騰地擺住。後面部車嘅司機忍唔住，多度按喇叭兼破口大罵：「X你個老X！喂！玩乜X嘢啊！」呢段由行車記錄儀拍落嘅畫面，其後流咗上網，引發全網公審。
片段後段可見，一名穿白色上衣嘅女子從行人路衝出，直向紫色私家車跑去，相信就係佢等緊嘅朋友。呢位紫車女司機據片主形容係「玩住電話等個朋友上車」，喺巴士站位停咗一部車，好似喺自家車房咁自在。
片主喺 FACEBOOK 群組「車cam L（香港群組）」發文指：「呢個女人真係犀利！停喺巴士站！玩住電話等個朋友上車！巴士站呀！點解你要停喺度呢！算我放過你！」
網民留言齊轟紫車司機自私，有人批：「啲人成日覺得香港任何地方都可以停車、上落客」；另有網民指「停喺巴士站度，要罰款兼扣分，畀條片交通部做嘢」。
按運輸署《道路使用者守則》，車輛（除獲特許者外）嚴禁喺巴士站、公共小巴站或的士站停車或上落客貨；根據《道路交通（交通管制）規例》，違例者定額罰款六百港元。
姣姐講多句：停車嗰位就係巴士站，唔係你私家停車位。你叫朋友走兩步路唔使嘅嗎？呢個咪正正係「香港任何地方都可以停」心態嘅最佳寫照——咪怪人哋用行車記錄儀幫你做嘢。
黃姣姐整合｜頂硬上
