11月7日 Threads 流傳一段港鐵天水圍站月台影片，一名穿白色吊帶短裙嘅女子因碰撞問題同一名男子嘈交，女子斥責對方「你掂到我呀！」，男子反駁「係妳掂到我呀！」。女子聽完挑釁「係咪要xxx呀？」，男子放棄爭拗走開，女子即時暴怒，以連環左右腳「金剛腿」狂踢幕門，發出「嘭嚶」巨響，據目擊者指踢咗約十下。
最有趣嘅係，港鐵職員到場處理，只問咗一句「係咪要報警」，女子便即刻收起金剛腿，乖乖上車離開。但上車之後，據另一名乘客上傳嘅車廂內影片，她仍多次大力踢車門，「嘭」聲不絕。
片一出，Threads 即刻炸咗。有人笑稱係「港版春麗」，「有食過夜粥，個前撐算幾穩」，仲有人嚴肅分析：「佢嘅泰拳前撐腳做得非常之好，留意下，佢嘅重心沒有過分傾斜，前腳掌部份出力非常之勇猛，係不可多得嘅人才。」
另一邊，大批網民批評離譜，「條裙着住都咁粗魯」，「刑事毀壞」，「點解咁空曠都可以掂到對方？」仲有網民反映日日喺天水圍站見過佢，「次次都末路狂奔咁跑去搭車」。
另外，部分網民質疑該「女子」其實係男扮女裝，隨即有網民反駁：「男人嚟㗎喎，睇個樣。」
姣姐講多句： 着住條裙搞金剛腿，呢個反差真係笑到我肚痛。但講真，刑事毀壞最高可入獄十年，呢幾腳踢完，代價唔係「報警」咁簡單就收場。
法例小知識
- 《港鐵附例》第25條：乘客不得造成滋擾，罰款 5,000 港元
- 《港鐵附例》第28H(1)(c)條：損壞鐵路處所財物，罰款 5,000 港元
- 《港鐵附例》第28A條：不恰當操作設備，罰款 5,000 港元及監禁 6 個月
- 《刑事罪行條例》第60條：刑事毀壞，最高可處監禁 10 年
黃姣姐整合｜頂硬上
