社群平台 Threads 近日颳起一股「開運桌布」旋風，主角係經典動畫《海綿寶寶》入面嘅比奇堡居民。一名網友發帖，話自己將手機桌面換成比奇堡居民排隊嘅畫面之後，無論生活、工作、財運，甚至腸胃運行都變得順到飛起。帖文一出即刻引起熱烈反應，短時間衝上超過 297 萬次瀏覽，大批網友跟住爭相換上同款桌布。
最誇張係一堆人喺留言區「實測」分享自己嘅好運。有開店嘅網民話換完之後日日生意絡繹不絕；有人路過彩券行試手氣，一刮竟然中咗兩千蚊（台幣，下同）；最勁係一位網民開心透露，自己剛換完桌布打麻將，就贏咗 2900 元。除咗財運大增，仲有網友前來「還願」，話自己傍晚換完桌布，竟然順順利利解決咗長年便秘之苦，腸胃都「開運」晒。
留言區仲衍生出成堆令人捧腹嘅幽默互動。有網民特別温馨提示：「千祈唔好換蟹老闆做桌布，否則會陷入成日加班嘅命運」，惹得全場共鳴；有人打趣話，之後去便利店掃手機付款，會發現身旁一排人手機螢幕全係同一幅畫面。成個留言區瞬間變成比奇堡桌布大晒台。
呢種將特定圖片設為「開運桌布」以求好運嘅做法，其實並非頭一遭。過去網路就曾風靡將日本資深藝人美輪明宏嘅相片設為桌布招財轉運；韓國女團 TWICE 成員娜璉亦曾帶起著名嘅「林娜璉玄學」，話換上佢嘅相片能大幅提升尾牙抽獎中獎同搶到演唱會門票嘅機會。而比奇堡居民，就咁接棒成為呢波玄學風潮嘅新寵。
姣姐講多句： 講真，玄學嘅精髓就係「信則有」，但成日靠換桌布開運，不如順便換個 mindset。不過如果真係有呢麼好使嘅開運玄學，姣姐第一個想問：蟹老闆嗰個「成日加班」嘅命，真係冇得破解咩？😂
