泰國北碧府（Kanchanaburi）一間叫索通猜（Sothornchai）嘅養老及精神照護中心，被查出喺部分床上面裝有金屬圍欄，房間及區域可從外面上鎖，將住民困於「鐵籠」之內，院區外圍仲設有多層鐵絲網。

事件曝光始於一名婦人上電視節目，控訴自己兩年多前遭兒子同媳婦騙入呢間機構，之後被強迫留置，期間遭毆打、威脅及強迫服藥，最後偷偷聯絡姐姐求助先掙脱。節目播出後引發關注，警方隨手調查，喺10月6日前往中心檢查。

業者自辯，指設置鐵籠係為限制出現嚴重精神症狀、可能傷害自己或他人、或可能離開院區嘅患者，又話相關設施係「防止住民跌落及受傷」。

衞生部精神健康署署長吉蒂薩（Kittisak）反駁：對情緒平穩嘅精神疾病患者或一般民眾使用鐵籠限制行動，「不是精神醫療標準，在任何情況下都不能這麼做」。

調查發現，呢間中心除鐵籠囚人外，仲有床位數超出執照核准數量、收治精神疾病患者卻未取得醫療機構許可等多項違規，目前已被撤銷執照並關閉。據報該機構住有逾百人，其中超過九成係精神疾病患者，精神健康署將評估住民狀況，再安排轉介其他機構。

硬蕉抽兩句：一間受執照同定期檢查制度管理嘅機構，可以喺床上面為住人安裝上鎖嘅鐵籠而冇人攞佢點？監護制度如果只係停留在文件同執照層面，弱勢族群嘅「安全」就只係紙上安全。鐵籠入面關嘅唔係人，係一套失效嘅監管。

硬蕉哥整合｜頂硬上