事主趕時間預先掃椅背收款碼，到站先發現個 code 唔係司機，被迫再掃司機手機俾一次錢；退款至今冇回覆，運輸署稱司機須確保車廂內二維碼屬正確支付方式。
有女生日前趕時間搭的士，快到站就預先掃咗前座椅背貼嘅收款二維碼，「諗住轉頭一睇個錶就直接畀錢，可以即刻落車走人」。車到停低冇跳錶，佢對司機話「我畀咗錢啦」，對方卻話「個code唔係我㗎喎」，更解釋係「啲人落廣告，放啲咩喺度我哋控制唔到」。事主唔想浪費時間爭，又怕被當坐霸王車，只好再掃司機手機嘅二維碼俾多一次。
相顯示椅背由左至右共三個收款 QR，有 PayMe 同支付寶等平台商標，但四周冇任何廣告標語或公司標誌，的確好容易令人以為係司機自己印出嚟嘅收款碼。事主事後質疑該收款帳户人別有用心，揶揄「原來宜家賺錢好容易，直接掛自己PayMe喺的士，坐定定喺屋企收錢 fat fat」。
佢向該收款帳户發起退款請求，但至今（10月9日）仍未收到任何回覆，未知能否追回款項。
呢單喺 Threads 攞起兩極討論：有人認為「以為嘟code俾錢之前，問一問司機係常識」、「亂咁掃code同亂㩒link完全無分別」；不過更多人覺得司機有可疑，「一早知有個唔係佢嘅code喺度但又冇遮好，揸開車做開生意，有乜理由唔知咁樣人哋會誤會」，並建議報警。
姣姐講多句：成個社會養戍我哋「見到 code 就掃」嘅習慣，但個 code 唔一定係佢嘅啦。趕時間冇錯，不過「我用乜乜畀？」呢一句，真係基本操作；但反過嚟，車廂貼住三個收款碼而冇人認，仲口口聲聲「廣告」，責任點會淨淨地落喺掃碼嗰個人身上呢？
背景補充：按運輸署規定，由 2026年4月1日起，的士司機須提供至少一種二維碼及一種非二維碼電子繳費媒介，違例最高可罰 5,000 港元及監禁 6 個月。運輸署回應指，司機應在車窗指定範圍張貼電子繳費媒介標識貼紙，並確保車廂內展示的收款二維碼屬正確支付方式，以免乘客誤會；乘客可向運輸署提供個案詳情（如車輛登記號碼、事發日期時間及交易紀錄），由署方聯絡車主跟進。
