現年95歲嘅黃夏蕙（夏蕙姨）去年底喺壽宴上高調宣佈，要追討已故丈夫胡百全留下嘅巨額遺產，預計可獲得逾3,000萬港元。日前佢接受YouTube頻道《橙色大笨象》訪問，一吐這單追討嘅始末、訴訟心路，同埋錢到錢會點用。
黃夏蕙18歲時同大佢廿幾歲嘅律師胡百全相戀，對方當時已有正室及子女。佢不顧正室反對，以妾侍身份嫁入胡家，為丈夫誕下六名子女，並強調與胡百全是「根據大清律例註冊」，子女出世紙都列明父親係胡百全。佢指律師同法庭已將遺產細節調查清楚，自己只是循法律及契約，爭取「名正言順」生活費：「法律查返出嚟，就知我每個月有生活費嘅。」
圖片：山風堂／CC BY-SA 4.0／Wikimedia Commons
講到先夫病重入院，黃夏蕙話胡百全離世至今已18年。佢指長房子女入稟申請禁制令，令佢連探病、打電話嘅機會都冇，更中斷原本生活費：「十萬一個月（生活費），但後來斷咗，所以嗰段時間我都捱得好慘。」佢指胡百全為六個子女留了基金，但佢攞唔到。至於近年先追討，佢話當年「冇錢、法援又唔幫」，依家係私人律師處理。佢直言唔擔心正室子女反對：「死晒喇，個仔同大女都死咗……」
最勁嘅係呢筆錢到錢會點用。黃夏蕙表示自己衣食無憂，承諾將逾3,000萬全數投入慈善，興建一所「唔收錢嘅」免費護老院，為有需要長者「生養死葬」。
姣姐講多句 95歲、6個仔女、3千幾萬遺產、免費護老院——呢個故事真正動人嘅位，唔係「舊情人攞錢」，而係一個以妾侍身份入屋嘅女人，用返法律做武器，為自己同六個仔女爭返一筆本該屬於佢嘅生活費。婚姻中女方嘅經濟地位，唔該靠簽紙，唔該靠「情」字。至于「大清律例註冊」呢句，真係比佢任何鹹濕梗都好笑。
