施永青撰文指避孕套係少子化元兇，建議政府規定廠商必須出一定比例會滲漏嘅次貨安全套，用嚟調控生育率。言論一出轟動全城，網民大感荒謬，反擊指「高樓價先係最強避孕套」。

中原集團創辦人施永青近日喺《am730》專欄以《避孕套嘅出現係生育率下降主因》為題撰文，指人類對「食」同「色」嘅本能歷久常新，但科技令避孕變得極其便宜方便，令人可以「只享受性愉悦，卻逃避留種責任」，完全有違天道。

為提升生育率，佢再進一步提出一項「奇招」：要求政府規定安全套公司，出廠產品必須有一定比例係「不合規格」嘅次貨，即會自然滲漏嘅安全套，令女性意外受孕，政府則可透過調校出廠嘅次貨比例，嚟「控管」地區生育率。

數據方面，統計處最新數字顯示，2025年至2026年年中出生人數僅2.97萬，首度跌穿3萬心理關口，創下1960年代有紀錄以來新低。

網民隨之猛烈圍剿，直斥想法離奇。連登網民笑言「搞錯敵人」，教年輕人節育嘅從來唔係避孕套，而係地產代理櫥窗上呎價高企嘅價單，直指高樓價同狹小居住空間先係年輕人唔敢生嘅核心原因。

消委會實測：產品「滴水不漏」

施永青將少子化歸咎於避孕套「太方便太可靠」，但消委會2020年曾測試市面上9個品牌共30款安全套（涵蓋橡膠 Latex、聚氨酯 PU 及聚異戊二烯 PI 三大物料），每款型號測試315個樣本。結果僅有2款橡膠同2款PU安全套各發現1個樣本漏水，因國際標準（ISO 4074）漏水限額為不多於2個，全部30款均無超標，全數符合國際標準。專家指出，正確使用合格產品，避孕成功率高達98%。

意外懷孕，4大「人為漏洞」先係主因

消委會及醫生指出，避孕功效由98%跌到約85%，主因全出在人為誤用：

漏洞1：戴兩層。 套與套之間產生極大摩擦力，反而容易破損或滑脱，防護徹底失效。

漏洞2：用油性潤滑劑。 凡士林、嬰兒油等油性成分會迅速腐蝕橡膠及合成物料，導致套身破裂，應改用配合水溶性潤滑劑。

漏洞3：用牙咬開包裝／用口替另一半戴套。 牙齒同指甲極易劃穿肉眼難察小孔；戴套前若已直接接觸，射精前液（尿道球腺液）亦可導致意外懷孕。

漏洞4：射精後過遲抽出／抽出時未握緊開口端。 應立即抽出並緊握開口端，否則套身鬆脱，精液即會外溢。

姣姐講多句

成件事嘅笑位就係：一個建議政府「強製做漏風產品」嘅理論，被現實數據反嚥。安全套本身冇問題，真正「漏」嘅係人為操作，而年輕人唔敢生嘅原因，大概唔會寫喺安全套包裝入面。

黃姣姐整合｜頂硬上