MIRROR成員邱士縉（Stanley）今年2月向拍拖九年嘅女友李炘頤（Alina）求婚成功，成為組合入面首位準人夫。呢個大日子終於要嚟喇：兩人落實唔喺香港擺酒，訂於10月底飛往東南亞國家舉行海外婚禮，一班MIRROR兄弟已預留檔期，屆時齊齊飛到當地，見證Stanley「落人夫」。
雪山婚照，一星期拍板
Alina於10月2日喺社交平台公開兩人今年3月遠赴雪山拍攝Pre-Wedding嘅幕後花絮。Alina透露，呢次雪山行程竟然係喺短短一個星期內拍板決定並火速執行，佢喺帖文中笑言：「十月衝一波，為咗防止自己老人痴呆唔記得，有些記憶還是值得用畫面記錄落嚟」，並多謝團隊陪佢一起「發癲」。
影片入面，Alina身穿白色婚紗，Stanley換上黑色西裝，兩人踩住單板滑雪，喺雪山同火山口前取景。Stanley喺冰天雪地中對住鏡頭高喊「我愛你」，又温柔叮囑著單薄婚紗嘅Alina「唔好凍親」，最後累到喊救命都堅持喺雪山頂高舉心形雪塊合照留念。
蒸氣熨斗壞，噴水頂替
最搞笑嘅係幕後一段小插曲：隨行嘅蒸氣熨斗喺關鍵時刻突然損壞，為咗處理Alina嘅頭紗，團隊唯有急中生智，以噴水方式保濕後再配合普通熨斗。環境咁嚴酷，兩人照樣完成呢套誠意同體力之作。
工作亦冇停
除咗籌備婚禮，Stanley近期工作都冇停：10月2日佢喺東京出席由MakerVille、韓國SimStory同日本富士電視台聯手製作嘅新劇《kiDnap GAME》全球首映禮，劇中飾演國際律師，同劇演員李準基、坂口健太郎、柯佳嬿、岡崎紗繪齊齊亮相。
姣姐講多句
拍拖九年先「落定」，睇嚇呢套能量：一星期拍板、火速執行、極寒天氣着婚紗踩單板滑雪，呢個工作態度真係令我哋普通人汗顏。月底海外擺酒，一班兄弟離港飛去見證，大件事真係大場面，祝賀金備住先啦。
黃姣姐整合｜頂硬上
