社交媒體近個月流傳一種危險玩法：將減壓玩具「捏捏樂」（Squishy）放進微波爐加熱，聲稱可以令它「更軟更好捏」。呢個操作喺英國、美國同澳洲接連引發事故，多名兒童被爆裂嘅玩具同高温內含物燒傷，最嚴重嘅要接受植皮手術。
英國格拉斯哥皇家兒童醫院喺過去8個月，處理咗6宗與加熱捏捏樂有關嘅兒童燒傷個案。8歲男童Joseph Erskine今年5月將玩具放微波爐，受熱爆裂後高温內含物濺中胸口同雙手，治療數星期後最終要喺大腿取皮膚移植，而且植皮部位未來2年都唔可以日照。另一名11歲女童面部同眼皮被燒傷、嚴重腫脹。英國兒童燒傷信託基金（Children's Burns Trust）數據顯示，相關燒傷個案比去年同期暴增260%。馬恩島消費者權益辦公室10月發出呼籲，「強烈敦促家長及兒童不要跟隨這個潮流」，並指出加熱會令玩具內部壓力上升、提高爆裂風險。
澳洲情況更嚴重。新南威爾士州1至9月間有11名6至12歲兒童因加熱捏捏樂被轉介到西米德兒童醫院燒傷及整形治療中心，傷勢涵蓋面部、頸部、胸口、手臂同雙手，部分需植皮及長期疤痕治療。昆士蘭兒童醫院兒科急症醫生Veevek Thankey指，4月以來最少有13宗相關燒傷個案，玩具內凝膠加熱後會變黏稠並持續高温，能喺極短時間對皮膚造成嚴重傷害。
資料圖片：Pixabay
美國同樣中招。伊利諾州9歲男童卡萊布聽同學提起網上的加熱玩法後照做，玩具喺佢臉同手上爆開，一隻眼腫到睜唔開，轉送Loyola醫療中心燒傷科留院一晚，幸好視力未受損。醫院燒傷外展統籌Kelly McElligott講：「這些玩具明明有標籤寫着『不可加熱』，但小朋友是不會看標籤的。」德州另一名13歲少女將玩具留喺烈陽下嘅車內超過4個鐘，取出擠壓時玩具爆裂，手臂同腿部3度燒傷。
澳洲墨爾本皇家理工大學化學專家Oliver Jones教授警告，「即使是世上品質最好的玩具，放進微波爐也會帶來額外風險」，並建議家長留意，唔好將呢類玩具留喺高温車廂。
姣姐講多句：呢種「加熱玩法」喺網絡傳成潮流，但玩具標籤寫明「不可加熱」，小朋友照樣唔會讀。呢個唔係小朋友蠢，係平台算法同成人嘅「創意」共同搞到嘅嘢——平台放流佢哋做，大人睇到又唔管。真係想幫細路減壓，買個正貨、唔微波就夠。安全呢兩字唔該寫喺所有社交平台上架。
黃姣姐整合｜頂硬上
