五個亞洲地區獨立製作人組織喺釜山影視市場成立聯盟，由《魷魚遊戲》製片人朗讀宣言——死亡遊戲同獨立宣言，擺埋一齊真係似入咗局。
週日，釜山國際影展「亞洲影視市場」（ACFM）上，五個亞洲地區嘅獨立電影製作人組織正式掛牌，組成「亞洲獨立製作人聯盟」（Asian Producers Alliance，APA）。負責喺台上朗讀「創盟宣言」嘅，係《魷魚遊戲》製片人金志妍（Kim Ji-yeon），佢亦係韓國製片人公會（PGK）嘅理事。
宣言內容大致講咗：「多年嚟，我哋各自面對同樣嘅變化——喺自己嘅市場、用自己嘅語言。今日我哋選擇一齊面對。」最後一句係「我哋會推動亞洲跨國合拍，令我哋嘅故事一齊拍、行得更遠」。
呢個聯盟由韓國嘅 PGK 同印尼嘅 APROFI 發起，會員包括菲律賓獨立製片人組（PIPG）、香港電影製片人協會（HKMPEA）同台灣製片人協會（TPA）。
成立儀式喺 PGK 主辦嘅「亞洲電影：團結與創意聯盟」研討會尾聲進行，由 PGK 國際委員會主任韓進主持。與會者包括印尼 KawanKawan Media 製片人、韓國 Sidus 行政總裁、東京 Knockonwood 山口慎、以及菲律賓 Epicmedia Productions 共同創辦人暨 COO Bianca Balbuena。
山口慎喺討論中講咗四個字：「Think globally。」佢講跨國合拍已唔係願望，係業界避唔到嘅未來。
APA 首任共同代表由 PGK 會長李東河同 APROFI 主席 Edwin Nazir 擔任；秘書長由韓進同 Bhara 共同負責，任期一年，每年大會改選。APA 首年開放畀亞洲其他地區製片人組織加入，同一地區可有超過一個組織入會。
姣姐講多句：一個做《魷魚遊戲》嘅人，站喺台上朗讀「創盟宣言」，五個人組織「入局」——你話成個場面有幾似第二集開頭？最關鍵係真係冇大財團，純靠獨立製作人自己搞，呢種「局」，唔使戴綠色背心。
黃姣姐整合｜頂硬上
