日本前女優蒼井空（現年45歲），2018年結婚、翌年誕生一對雙胞胎兒，引退後相夫教子。不過佢嘅舊職業標籤，似係甩唔甩嘅。10月23日，佢喺X（前稱Twitter）發文求助，話仔女放學後喺公園玩耍，有間中學高年級學生「特意確認父母不在附近」，喺極近距離朝個仔臉部猛力投球並精準擊中，仔女最後哭著跑返屋企。佢喺帖文問網民：「像這種事，就算向學校報告是不是也沒什麼意義？還是報告一下比較好？需要去揪出犯人嗎？還是算了吧？」，更坦言擔心自己處理唔當，會變成人哋眼中「麻煩的媽媽」。
帖文一出，網民反應兩極。一部分人提醒佢，唔管仔有冇傷口都應先帶去睇醫生，再向學校或警方反映；另一邊，就有人將焦點轉去佢AV女優身份，留言「等上了初中，媽媽的經歷會讓他受欺凌得更慘」、「施暴者的爸爸可能看過蒼井空的作品」、「AV女優的小孩遇到欺凌一點都不意外」，甚至有極端留言「AV女優就不該生孩子」。
見事態失控，蒼井空刪除原帖，喺10月25日至27日連續發文回應，佢明確表示：「我們家孩子被高年級砸球這件事，跟我的職業一點關係也沒有（笑）」。佢解釋自己原本並無將事件定性為欺凌，只係反省不應該喺社交平台公開討論，順帶批評媒體「為博取點擊率而隨意編造解讀」。
佢更表示，不少人只看標題而唔讀內文，事實被扭曲後又被人藉機攻擊佢「AV女優不配生子」，令佢「大感無奈」。佢強調，作為父母當然有不希望仔女入嘅行業，但唔應該有歧視或偏見，「任何職業都應該受尊重」。對於有酸民辱罵「你父母是妓女」，佢冷靜回應指，會講呢種嘢嘅孩子，同佢哋家長，「才是問題所在」。
呢啲話佢好早講過。2023年11月，蒼井空喺網絡電視節目受訪時已透露，結婚後常遭網民言語欺凌，被酸「媽媽是AV女優，小孩好可憐」、「當她的小孩絕對不會幸福」。佢當時反擊：「到底是誰決定你很可憐？」，並直言仔可不可憐只有仔自己決定，「只要能感受母親的愛就足夠」。
佢隨後又喺X同網民就「子女被欺凌」問題深入討論，佢質疑：若仔女因媽媽嘅過往職業或言論被欺凌，學校或對方家長難道就「理所當然」？佢更感慨指，呢啲正正暴露出欺凌無法根除的本質，「因為周圍的大人當中竟有著這種狹隘的觀念」。
姣姐講多句：一個仔喺公園被人當面砸球，佢媽媽問一句「報不報學校」，就捱到呢多留言，真係令人啞口無言。一個仔嘅傷痛，唔應該因為媽媽嘅職業而打折，更加唔好因為「大人世界有呢種狹隘觀念」就當正常。
黃姣姐整合｜頂硬上
