特朗普 9 月 29 日簽署行政命令，要求美國政府所有機構將「AI」同「artificial intelligence」改稱「SI」同「super intelligence」。翌日，斯洛維尼亞國家域名 .si 錄得 11,000 個新註冊。最啷嘅係，第一夫人梅蘭尼婭正正係斯洛維尼亞人，故鄉域名一夜之間插翅飛。
管理斯洛維尼亞域名嘅 Registry SI，發言人 Klara Herman 今週表示，9 月 .si 註冊量升 2,199%，惟佢冇將呢波熱潮全歸因於行政命令。Registry 記錄，9 月 30 日錄得 11,000 個新位址；截至 10 月 2 日，過去 24 小時更新增近 13,000 個 .si 域名。
域名變金礦呢招，其實似曾相識。AI 熱潮初起時，同屬國家域名嘅 .ai（安圭拉 Anguilla）已經爆過一波，為呢座小島帶入幾百萬美元。
Hosting 平台方面，數據各異其趣。Hostinger 話 .si 已係佢哋第二大域名，排喺 .com 之後；9 月 30 日約 4,300 個新註冊，10 月 1 日約 5,400 個，9 月 23 日以來超過四分之三嘅新註冊集中喺最近兩日，買家過半來自美國同印度。Wix 話完全無「有意義嘅升幅」，GoDaddy 則根本未提供 .si。
姣姐講多句：一份行政命令將「AI」抹走「人工」二字，改叫「super intelligence」，改名係政治，市場唔睇政治。.ai 當初點，.si 而家就點，熱錢同泡沫從來唔問國籍。梅蘭尼婭嘅故鄉呢單，坐地收錢，最啷。
黃姣姐整合｜頂硬上