股評人沈振盈（Louie Shum Chun-ying），網民稱佢「沈大師」，10月24日晚上喺律敦治醫院離世，享年65歲，胞妹沈振珊發出訃文證實。沈振盈八十年代中後期踏入證券業，長期擔任訊滙證券行政總裁，2024年初退下前線，但一直活躍於網台節目，離世前一天（10月23日）仍然開咪。
「燈神」同「避險先知」，係網民對沈大師評價最兩極嘅兩個詞。有散户奉佢為避險先知，有人卻改圖佢預測大市要跌嘅日子做「沈判日」笑嘢。沈大師亦係有自知之明，佢曾反擊話恒指未上到4萬點之前，「誰審判誰」還是未知數。退休前沈大師甚至轉做「大好友」，看好港股終有一日見4萬。可惜4萬點未見，人先走。
網民對呢個消息反應唔算小，社交網站留下一水「一路好走」。有人回憶最深刻嘅係佢嘅金句，呢啲短句比任何技術分析都令人記得啲：「一股不留」、「升上火星嘅價，終須返回地球」、「大市要你滅亡，必先令你瘋狂」、「Cash is King」、「贏谷輸縮」、「未跌過嘅人出來講股票，你唔好聽」、「投資睇緣份」——每句都有佢嘅草根同狠勁。佢對樓市都唔留情：「樓市死路一條」，更公開話自己冇買樓，拒做樓奴。
「姣姐講多句」：成日鬧佢燈神，但講真，沈大師呢種敢講「大市要你滅亡」嘅人，喺呢個「大好友」比「大壞友」多幾倍嘅網台圈，其實好稀覯。佢嘅金句最值錢，唔係預言準唔準，係敢唔敢喺最瘋狂嗰陣，開口喊散户收手。
恒指上4萬點未見，佢最癲嘅預言始終未兑現；但佢最後一期節目，確實係講俾所有跟住佢炒咗幾十年嘅人聽。一路好走，沈大師。
