近日天氣熱，將軍澳維景灣畔一名男街坊被拍住赤裸上身在屋苑平台行走，有住户喺「維景天地」網上群組將相公審。

帖主稱理解近日天氣炎熱，但唔滿對方「周街走」赤膊，話此舉「影低屋苑檔次」，又話「如果唔係認得你，我仲以為係裝修師傅或者係搬運工」，要求對方下次留意。相片中嘅男子皮膚黝黑，左右手各執一條毛巾，下身穿黑短褲、腳着運動鞋，望落就好似剛運動完。

帖一出，網民即刻圍剿。有人斥帖主「狗眼看人低」，有人揶揄「你個樣夠影響香港檔次啦，你唔蒙面？」，有人更直接「希望你下次唔好偷拍人哋擺上網公審」。

另一派則力撐赤膊無問題：「赤膊上身本身並不等於違法，亦不代表對方係裝修工人、搬運工或『影低屋苑檔次』，如果冇違規，就不應以衣著、外觀或假定職業去貶低人」，亦有網民話「呢個係佢生活同自由權利」。

法律方面，大律師陸偉雄指，法例無規定不可赤裸上身；若無故意滋擾他人，例如赤裸上身送貨，並無違法，亦不構成性騷擾。《刑事罪行條例》第148條只針對「猥褻暴露身體」，定罪最高可罰款2,000元及監禁6個月。

姣姐講多句：天熱赤膊係基本自由，用衣著同外表去估人職業、估人檔次，先係真係「影低」咗自己。下次想公審人哋之前，最好先照下鏡。

黃姣姐整合｜頂硬上