成人題材｜18+
中原集團創辦人施永青11日提出，「生產次貨避孕套」刺激生育，又指避孕套令人「只性交不留種」，形容係「完全有違天道」。有關言論即時引起網民熱議。
連登有網民直接開炮，指施永青「搞錯了敵人」，話真正教年輕人節育嘅，從來唔係便利店貨架入面嗰包，而係地產代理櫥窗入面嘅價單：「高樓價才是最強避孕套！」。有人更用經典句式反擊：「風水佬就呃你十年八年，但係地產佬就呃你一生一世！」，仲有人提出「生3胎，送3房1廳，不用你控制避孕套，年輕人爭住生」。
施永青嘅論點，係科技令避孕變得太方便太廉價，係生育率下滑嘅主因。不過研究唔太買單：諾貝爾經濟學獎得主加里·貝克（Gary Becker）喺1960年代早已指出，避孕套只係令「唔想生」嘅選擇變平咗，並非核心原因。真正將樓價同生育率掛鈎嘅，係 Dettling 同 Kearney 喺2014年發表喺《Journal of Public Economics》嘅研究——美國大都會統計區嘅中位數樓價每上升1萬美元（約7.8萬港元），非業主家庭嘅生育率便下跌2.4%；反之，業主家庭因資產升值嘅財富效應，生育率反升5%。換句話講，樓價係唔係「避孕套」，全部取決於你係咪已經「上車」咗。
再睇返香港嘅數據：總生育率2024年跌到0.84，屬全球最低之列。Demographia《2026年國際房屋負擔能力》報告話，香港樓價收入比率14.1倍，要不吃不喝14.1年先置到業，連續16年做全球最難買樓嘅城市。未來經濟學院數據顯示，新落成住宅單位平均面積由1995年嘅50.4平方米縮到2024年嘅37.2平方米，2021年人口普查又話劏房居民人均居住面積只有6.6平方米。一個35平方米、等齊3個車位嘅細單位，售價仲要500萬港元以上。當連張嬰兒床都擺唔落，生育自然變奢望。
UNFPA報告仲指，韓國「傳貰房」（全租房，Jeonse）租約制度令年輕人背巨債、遲婚遲育。相反，新加坡靠「組屋贊育計劃」，優先編配新組屋予有子女嘅首購夫婦，再加高額育兒補貼同有薪產假，當地就真係有「無組屋，無孩子」嘅説法。
姣姐講多句： 想穀人頭，就唔好同人谷錯方向。真正要「漏水」嘅，從來唔係便利店嗰包避孕套，係樓價。
黃姣姐整合｜頂硬上
