10月5日瀋陽棋盤山風景區石欄傾倒，4歲女童右股骨折、累及生長板；母親公開病歷求徹查，網民質疑石欄只係膠水黏合，景區反稱「不可能坍塌」。
瀋陽國慶長假期傳兒童受傷事故。10月5日早上10時許，遼寧瀋陽市棋盤山風景區大壩附近，一名4歲女童正在遊玩，旁邊一排石製護欄突然傾倒，多塊大型石板砸中佢右腿，當場痛到站唔到。
女童當日中午12時01分被送入瀋陽市骨科醫院急症室。電腦斷層顯示「右股骨髁骨質斷裂，累及骺板」，確診「右股骨遠端骨折、骨骺損傷」，即俗稱生長板受損，日後有骨骼發育異常風險。母親翌日帶佢乘高鐵到北京積水潭醫院求醫，完成支具安裝，家長稱女童需制動約1至2個月。
最刺耳嘅係景區嘅反應。留喺瀋陽嘅家屬在警員陪同下要求調取現場閉路電視，景區卻稱「護欄不可能坍塌」，又話涉事護欄唔屬於佢哋管轄，係水利局負責；水利部門冇人回應，調查一時停頓。女童母親事後喺小紅書公開現場影片及病歷，引用國家標準GB 51192-2016《公園設計規範》第8.2.5條，要求徹查施工、驗收及管理責任並賠償醫療費用。
事件曝光後，網民大談石欄工程，有人看現場圖片後質疑「石欄只係用膠水黏合」，一推就倒。有自稱造橋專業畢業嘅網民提醒：「絕大部分橋樑嘅絕大部分欄杆，承受橫向負載嘅能力都極其有限，總結就是，見到欄杆別靠、別踩。」
母親在文中寫道，事發後四天一直逼自己冷靜照顧女兒，但「每當閉上眼睛，事故現場就喺眼前回放；每次見到佢拉住我哭着説『媽媽我好怕』，心裏就似撕碎一樣」。佢話自己嘅訴求「簡單極了」，就係希望女兒有日能再開開心心蹦蹦跳。
姣姐講多句： 個細路被砸到骨折，家長要帶佢由瀋陽搶去北京醫，景區卻話「護欄不可能坍塌」。呢種「不可能」嘅答辯，比膠水黏石更令人後怕。細路係受害者，唔係俾人笑嘅位；真正該被笑嘅，係嗰個「唔可能」嘅迴應。
黃姣姐整合｜頂硬上
