近日有司机喺網上駕駛群組上傳一段約17秒嘅行車記錄片段，指自己近日喺沙田大涌橋路駕駛，準備左轉入富豪花園時，見前方行人過路處亮起紅燈，但一名推嬰兒車嘅女子竟然無視燈號，照樣橫過馬路。
片段顯示，該女子推住BB車過馬路時先望咗右邊，唔知係咪「睇錯方向」，但紅燈亮緊都無理會，繼續橫衝。司机見狀立即停車，女子回過頭見到車輛後一時錯愕，但冇選擇退回行人島，而係繼續向前離去。更離譜係，身後另一名女士見到司機停車後，亦跟隨對方急步衝紅燈過馬路。
呢段影片喺9月29日（週二）上傳到Facebook群組「馬路的事討論區」，引來網民大罵。批評聲有「紅公仔照過」、「不知所謂」、「過遲一陣會執輸？」，又有人指「呢個燈位八成時間無車，等綠公仔耐過彌敦道，但不是衝燈藉口」。對於身後跟隨衝燈嘅女士，亦有網民批評「後面個行人仲急步」。至于及時停車嘅司機，有網民表示「至少你肯停」、「差啲係你出事呀」。
根據香港法例第374G章《道路交通（交通管制）規例》，喺有交通燈號控制嘅行人過路處，行人必須遵從燈號指示；紅色燈號穩定亮起時，即表示行人不得橫過或開始橫過車路。無合理辯解而違反者，可被罰款港幣2,000元。
姣姐講多句：推BB車唔代表有「特權」衝燈，小朋友安全係第一優先。紅燈就係紅燈，衝燈就係錯，唔分大細，呢啲唔使講都知。
黃姣姐整合｜頂硬上
