美國演出產業統計組織 Pollstar 最新公佈「ASIA FOCUS CHARTS: TOP TOURING ARTISTS」，統計期間由 2025 年 8 月 1 日至 2026 年 7 月 31 日。呢單榜單一出，韓團 SEVENTEEN 直接以亞洲巡演收入奪下冠軍，而去年同一榜單中屈居其後嘅 Coldplay，今年要望「舞台匠人」後背。
數字睇嚇先：SEVENTEEN 喺呢 12 個月內錄得 9739 萬 4004 美元（約 1300 億韓圓）巡演營收，門票銷量高達 66 萬 1088 張。今年 5 至 6 月喺韓日兩地辦嘅大型粉絲見面會，動員超過 23 萬 8000 名觀眾。
最值得一提，SEVENTEEN 成為首個喺香港最大規模嘅啟德體育園連開 4 場並全數完售嘅 K-POP 歌手。佢哋由去年 9 月啟動嘅「SEVENTEEN WORLD TOUR [NEW_]」，巡迴仁川、香港、新加坡、曼谷等地大型體育場館，光係喺日本主要巨蛋及亞洲大型體育場同巨蛋就演出 22 場。
小分隊同個人動靜亦一樣熱。淨漢 X Joshua「JEONGHAN X JOSHUA JOURNEY INTO [DREAMING]」仁川首場，預售當天秒殺；Hoshi X Woozi、S.Coups X 珉奎、DK X 勝寛、V8、Dino 等成員，過去一年亦接連喺亞洲辦個人演唱會同粉絲會。
「姣姐講多句」：Coldplay 被超車唔係意外，韓團將「小分隊分流」玩成常態，幾乎係一人一支隊、團一個大團，同一陣人喺同一地區行兩條線，票房自然厚。呢個模式，傳統西方樂團未必跟得起。K-pop 呢套「分拆式巡演」玩法，已經喺亞洲市場打贏老牌天團。
