蔡俊彥（Ryan）完成亞運劍擊比賽後，於10月9日推出全新派台單曲《你是來搗亂的》，並為MV飛往台北取景，還特意邀請小薯茄吳冰擔正女主角，飾演一個「E人」角色，入侵作為「I人」嘅Ryan，將佢有條理嘅生活搞得乜都冇。
呢首由陳考威同潘宇謙（AP）作曲、黃偉文填詞嘅Asian R&B風情歌，講嘅就係「I人」同「E人」拍拖嘅日常——你話佢擾亂你，但其實又係一段幸福到帶點失控嘅愛情。Ryan自己都講：「兩個人相愛，個性或習慣不一定要完全一樣，一凹一凸、各有不同，與對方互補，反而能夠令一段感情更為美滿、更加充實。」老實講，呢段講得好似講我哋每一位港人拍拖。
最有趣嘅位，係拍攝時嘅趣事。阿冰話初次見Ryan，覺得佢外表冷靜沉實，原來骨子裏搞笑，仲舉例：拍舞廳戲時見到面鏡寫住「顏值越高 責任越大」，佢就問Ryan覺得自己責任大唔大，Ryan答「唔係好大」，打完條呔又話「我責任大咗」。而Ryan則表示，一直以為阿冰係內歛靦腆嘅人，結果發現佢好活潑，「我覺得得我做緊自己，但後尾發現阿冰都係演緊佢自己」。阿冰仲話：「掉轉嚟演（阿冰演I人），我都得！」
講到難忘片段，Ryan話係舞廳Lip Sync那段，起初尷尬到抗拒，最後信專業意見，仲有較多演出經驗嘅阿冰出招：「同對手對望時可望眉心，避免尷尬。」阿冰則話沙灘日落景最難忘，好天氣配風景，成功收喺MV入面。
成人題材｜18+
姣姐講多句： 一個打劍擊嘅運動健將，轉頭要學「睇眉心」呢啲技。I人同E人真係可以行成一段，唔使互相改造，互相「搗亂」都無所謂，只要係自己人，就好。
黃姣姐整合｜頂硬上
