網絡最近流傳一張手機App召車對話截圖，惹起廣泛討論。根據Facebook群組「的士司機資訊網 Taxi」10月8日流傳的照片，事發凌晨約4時，一名乘客以簡體字告知司機「孕婦」「羊水出來了」，司機則回覆「你叫十字車好啲吧」。帖文指出該App介面有「乘客非本地用户，可能無法通過電話聯絡你，請你通過發訊息與乘客聯絡」的提示，料事發地為內地。
帖文樓主寫道：「咁樣做係咪好衰？出羊水點解唔call白車？」
網民討論中，少部分人為司機辯護，稱「一定唔去，有咩事咪大鑊」；但更多人怒批司機不察。有網民指出「紅白事另計，積福」，亦有網民提醒穿羊水未必代表即時分娩，「叫白車反而先唔合理」，應「盡快搭的士去附近或預約醫院」。
亦有過來人分享自身經驗。一名網民指自己亦是的士司機，太太穿羊水時「都係搭的士，正價屯門去伊利沙伯醫院」；另一網民指太太穿羊水時「都係半夜call的士去醫院，醫院上堂教，非必要唔使叫白車，最緊要係加張護墊，唔好整污糟人哋架車」。
據衞生署家庭健康服務網站資料，穿羊水係分娩的徵兆，但亦可能於懷孕任何階段發生，隨着羊膜破裂時間增長，子宮及胎兒感染機會增加，故孕婦發現穿水應盡快前往醫院檢查。
姣姐講多句： 呢單嘢最唔得嘅地方，唔係的士貴定唔貴、白車快定唔快，而係司機喺最關鍵嘅時刻，完全冇意識到乘客處於緊急狀態。一個App可以召到車，可以將人送到醫院，但佢唔會判斷「羊水出來了」五個字意味着乜。呢啲App嘅設計，唔應該止於派車，而應該有緊急情況嘅識別同升級機制。孕婦同未出世嘅BB，唔應該因為一個司機「唔知」而要等落去。
黃姣姐整合｜頂硬上
