成人題材｜18+
菲律賓現年26歲嘅成人平台網紅斯邁爾斯（Maeurn Smiles），用社交平台賺到嘅收入喺家鄉宿霧出資興建學校，預計落成後可容納約300名貧困學童。呢個項目引起大熱議，有人讚佢係英雄，有人批評佢嘅錢「唔乾淨」。
斯邁爾斯喺社交平台坐擁逾300萬粉絲。佢原本立志做老師，可惜17歲就因為家貧交唔起大學學費而被迫輟學。佢試過做線上一對一英語教學，之後轉型做成人內容創作者，賺到可觀收入。2024年，佢花咗175萬菲律賓披索（約22萬港元）喺宿霧買地，開始興建學校。
最初斯邁爾斯只打算捐出土地，後來決定連建築費都一併承擔。佢創辦嘅教育項目「Mundo and Mae Educ」網站顯示，該校設有11至12間課室同教育中心。有樣嘢令佢決定自己出錢自己監工：佢原先打算將土地交給當地政府建校，但得知政府接管後學校就唔可以用亡父嘅名字命名，於是改主意自己出錢、自己監督，好讓學校能繼承家族之名。
2025年，學校嘅小型學習中心已經率先開放，當地兒童可以參加科學實驗、烹飪及其他實作活動，主校區仍在施工。
網民就「結果正義」同「資金來源」大對決。一方認為「英雄莫問出處」，「不是所有英雄都穿著披風，那些孩子有書讀才最重要」；另一方則認為「結果正確不代表過程正義」，擔心將成人產業的資金用於教育，無形中是將成人產業「正常化」，甚至對未成年人價值觀造成不良引導，「教師和網黃不應該被混為一談」。
目前學校項目仍處於初步建設階段，何時全面運作、最終能服務多少學生，仍有待項目團隊公佈。
姣姐講多句：呢單嘢真正好笑嘅地方，唔係錢係咪「乾淨」，而係社會對成人創作者嘅審視，同對佢哋貢獻嘅雙重標準。一個17歲輟學嘅貧窮女仔，用佢自己嘅雙手賺嚟嘅錢，買地幫細路有書讀、紀念自己嘅亡父，點樣都會有人跳出嚟先審佢嘅資金來源？呢個唔係錢嘅問題，係我哋成個社會對邊緣行業從業者嘅 stigmatisation：做善事要證明，證明就係被審問你做過乜。唔係唔可以討論資金來源，但討論之前，先睇人哋做咗乜。
