現年46歲嘅歐倩怡與郭晉安離婚兩年，近年以單親媽身份轉型做運動營養學家，亦不時喺社交網分享日常。睇佢離婚後生活相當慳家，光顧平價壽司連鎖店、賣車改搭地鐵，貼地得很。
前日佢於社交網罕見上載一張零濾鏡素顏大頭照，係剛游完水，面同髮都濕晒，下半臉仲用口罩 emoji 遮住，眼眶周圍紅印誇張到好似剛做完拔罐。
佢喺帖文向網民求救：「咁醜樣嘅相都俾大家笑嚇~~因為我想問……有邊隻泳鏡游完水後，雙眼唔會好似做咗拔罐咁？」
帖一出，唔少泳客留下同感，紛紛建議佢換無矽膠邊框泳鏡。最抵死嘅係有網民指佢意外撞樣「飛魚」方力申，留言：「立眼睇以為方力申！」
姣姐講多句：平時保養得宜、皮膚白滑嘅靚媽，遊完水竟然要人認成方力申，呢個反差大概係全網最貼地嘅「撞顏」笑話。方先生若收到消息，大概都會先照下鏡。
