10月6日起，歐洲議會大廈連接兩座大樓嘅通道交叉處，喺人流最繁密嘅地方，多咗一尊兩米半高嘅雕塑。
呢尊雕塑，係丹麥藝術家高志活（Jens Galschiøt）嘅《橙色瘟疫》（Orange Plague）。作品塑造嘅係特朗普赤身裸體、渾身鍍金嘅形象，佢坐在一名消瘦男子嘅肩膀上，手中握住一根高爾夫球桿。底座刻住：「我坐在一個人的背上。他在我的重壓下逐漸下沉。我會竭盡所能幫助他，但除了從他的背上下來之外，我什麼都願意做。」
雕像表面覆蓋住23K金。高志活話，呢件作品旨在批評特朗普阻礙全球應對氣候變化嘅努力。雕像旁邊嘅説明將佢稱為「不義之王」（King of Injustice），正「騎坐在一名男子的背上」。
今次喺歐洲議會展出，係丹麥籍歐洲議會左翼議員克勞森（Per Clausen）特意邀請高志活嘅。克勞森好直接：「如果有人如此脆弱，連這座雕塑都無法容忍，那麼他們根本沒有資格登上世界舞台。」
之前呢座「不義之王」已經喺巴西COP30氣候大會，同埋今年2月慕尼黑安全會議公開展出過。今次喺歐洲議會，人流繁密，行過去就要同佢照面。
硬蕉抽兩句。叫《橙色瘟疫》，呢個「橙」字本身就雙關。而歐洲人點做？將一個國家嘅總統喺自己議會大廳，用金同裸體，做成一尊喺邊度都唔會走嘅「瘟疫」。呢係自由國家嘅做法：你可以鬧佢，可以諷刺佢，甚至可以將佢雕喺你議會嘅通道入面，兩日之後再收埋。有邊個地方，敢喺自己議會大廳雕一個自己嘅獨裁者，講「呢個就係你」？
硬蕉哥整合｜頂硬上
