4日播嘅一集《女神配對計劃2》，吳旭東同阮嘉敏嘅甜爆互動，即刻喺網上炒到風聲水起，有網民封佢係現實版「霸道總裁」。
阮嘉敏其後喺社交平台發文剖白，交代當日到底發生咗乜。佢話錄影廠冷氣凍到飛起，加上「搶櫈」環節由清晨一路拍到夜晚，超過十個鐘，佢拍到尾聲都凍到不停流鼻水。就喺雙手要浸冰水、準備第三次落手嗰陣，吳旭東居然忍唔住挺身阻止，佢話自己雖然被嚇了一跳，但被對方舉動深深打動：「嘉賓打破遊戲規則，他那一刻或許只想我不再凍……我蠻欣賞這種直率而有温度的舉動。」
佢仲話吳旭東唔止鏡頭前咁，鏡頭後都處處關照：拍攝前佢曾貼近關心「妳冷不冷？」，佢答「嗯，有點冷」，句未講完拍攝已經開始，直到浸冰水環節，佢先有得救。
帖文一出，吳旭東即刻喺留言區放閃，9字喊話「為我嘅女神，義無反顧！」，燒爆成個評論區。網民齊讚：「東東，你是最好的」、「你讓我看到了真誠、真心」、「為愛繼續努力爭取！」。
阮嘉敏亦冇忘感謝「神助攻」Mark吳俊峰。佢話估計阿Mark係見到東東好著緊自己，所以成人之美，呢件事「很有男人的浪漫，有風度亦有氣度」，有咗呢位好朋友真係福氣。
姣姐講多句：「霸總」呢個標籤唔係自封，係「義無反顧」掙返嚟。破規無所謂，關鍵係破嘅係唔係對嘅規——凍到流鼻水嗰陣有人肯挺身而出，呢啲先至係真嘅暖。
黃姣姐整合｜頂硬上
