10月6日朝早近8時，北角百福道一段近5秒嘅車cam影片喺網上流傳：一名男子手持書包、拖住載有另一書包嘅買餸車，帶住兩名校服男童，由「黃格仔」旁直接違規橫穿馬路趕返學，一度同駛至嘅私家車距離極近，場面驚險。幸而司機即時減速，未有碰撞。
呢段影片出自網民上傳嘅車cam片段，拍攝時私家車沿百福道擬轉入健康中街，前方車轉彎後先影到三人出現喺馬路中間。影片流出後，樓主慨嘆「呢位慈父已經唔係第一次咁樣同仔過馬路，遲早一鑊」，話指呢位父親早已成習慣。
網民反應極度洶湧，不少留言怒斥：「害死細路」、「企定定等車撞」、「其身不正，教壞細路」、「有冇搞錯，點教仔㗎？咁嘅父親都有！」
最諷刺嘅係，事發地點不遠處就有交通燈控制嘅行人過路處。按香港法例第374G章《道路交通（交通管制）規例》第39條，行人喺距交通燈過路處15米範圍內必須使用該過路處，違者可被罰2,000港元——有燈位唔使去，偏偏行到「黃格仔」側闖。
姣姐講多句：拖住買餸車帶仔過馬路，好似返茶餐廳「順手」帶兩包餸，但個買餸車真係唔應該當橫路旗。教仔嘅最佳示範，唔係「我唔怕就冇事」，而係「有燈位就企返企等」。個仔眼淺，學嘅係你嘅日常。呢位北角慈父，下回記得帶仔行過燈位，唔好再行「黃格仔」。
