tvN同Amazon Prime Video同步播出嘅新韓劇《我的有罪之人》（又名《偽裝戀愛》），由任時完、薛仁雅主演，改編自網漫《為什麼不知道是女人？》。劇中任時完飾泰剛集團財閥三世尹以俊，因為貼身秘書韓恩英陳屍辦公室置物櫃而淪為命案嫌疑人；薛仁雅飾特種部隊出身女刑警姜在熙，女扮男裝應聘私人秘書潛伏身邊查案。
按邏輯嚟講呢部劇應該係一齣劍拔弩張嘅貓鼠遊戲，點知第2集開始嚴肅懸疑氣徹底失守，變成「財閥三世崩壞劇場」。
第一幕名場面：姜在熙離開洗手間，被尹以俊嘅愛貓Jerry（結莉）嚇到向後急退，一頭撞入佢身上，任佢整個人臉朝下栽進貓砂盆。上一秒係高冷多疑、滴水不漏嘅財閥繼承人，下一秒滿臉貓砂呆立當場，前後反差大到網民瘋狂截圖。
資料圖片：Pixabay
第二幕：第2集尾段，尹以俊剛洗完澡只圍住浴巾出房想同姜在熙道歉。佢不斷靠近，佢又要壓住慌張怕女身曝光唔斷推佢走。最後佢出於保鑣本能「王子抱」扶佢，浴巾即場滑脱，場面又曖昧又尷尬。
前面第1集其實已經預先埋雷：面試嗰日，尹以俊問姜在熙「你殺過人嗎？」，佢話軍中曾見前輩因佢猶豫而死；尹再問「如果兇手就喺面前你會點做？」，佢即場將面試官過肩摔落梳化，最終因「襲擊尹以俊」落選。到咗停車場阻止家屬襲擊尹，先至入職；受聘條件係「必須將我放在首位、無條件喜歡我」，佢一句「我會喜歡你」搞定。
整齣劇嘅調性就係好似個平時扮得很正經嘅少爺，突然被貓嚇到跌埋落垃圾桶——反差到位、笑點直接，唔使太動腦。
姣姐講多句：睇韓劇最開心嘅唔係劇情多嚴謹，係嗰刻明星「唔再係明星」嘅一秒。任時完滿臉貓砂嗰個呆立，係全劇最「真人」嘅鏡頭。
