11月7日，本港社交平台Threads流傳一段引起廣泛討論嘅影片：港鐵天水圍站月台，一名身穿白色吊帶短裙嘅人士同一名男子因為碰撞問題爭執，爭到最激烈，佢竟狂踢港鐵幕門。
由碰撞開始，越踢越兇
事件源於呢兩位互相指責「你掂到我呀！」，男子反駁「係妳掂到我呀！」，佢聽完就挑釁：「係咪要xxx呀？」（影片聽唔清），男子已經想走開：「唔同你拗！」，但佢根本收唔到尾，咆哮「死老嘢！早啲死啦！」，之後就開波，連環左右腳狂踢幕門，「嘭」聲不絕，網民數過約踢了十下，旁邊少年見狀即刻走開。
五字KO
港鐵職員趕到，只問了一句：「係咪要報警？」
就係呢五個字，即刻止損。涉事者收起「金剛腿」，上車離開。
上車後繼續踢
資料圖片：Pixabay
但故事冇咁快結束。另一名乘客隨後上載車廂內拍攝影片，顯示列車已載滿乘客，佢喺車上仍繼續大力踢車門，「嘭」聲不絕。
網民兩極反應
Threads上反應兩極。一批人笑到爆：「港版春麗」「有食過夜粥，個前撐算幾穩」，仲有人認真分析佢嘅「泰拳前撐腳」，話佢重心冇傾斜、前腳掌出擊勇猛，「不可多得嘅人才」。另一邊則嚴厲批評：「刑事毀壞，着住條裙都咁粗魯」「情緒咁唔穩定唔應該畀佢上車，報警」。
法律後果唔細
根據《港鐵附例》第25條，在鐵路處所作出具滋擾行為可罰款5,000港元；第28H(1)(c)條禁止損壞鐵路處所財物，同罰5,000港元。更進一步，根據《刑事罪行條例》第60條「摧毀或損壞財產」，無合法辯解而損壞他人財產，最高可處監禁10年。
姣姐講多句
講真，呢個事好笑完，有少少想問：呢個人日日由天水圍搭到香港站（有網民話見過佢），究竟係乜嘢令佢情緒失控到呢步？「係咪要報警」五個字可以止佢嘅腳，但止唔到呢個城市嘅壓力。幕門修好就完，人修唔修得好，就冇人知。
黃姣姐整合｜頂硬上
