近日有段港鐵東鐵綫車廂影片喺網上翻紅，鏡頭入面一位大叔企喺車門前紮穩馬，雙手不停出拳收拳，一套拳打完似乎意猶未盡，站直身再返轉頭紮馬做第二輪，尾段仲有做伸展拉筋。而佢身前就係成日開閘關閘嘅車門，位置幾「危險」。
最矚目係喺車門邊另一位男乘客，留意過一兩眼後就繼續埋低頭睇手機，完全唔理佢，簡直隔籬位大師兄。目擊乘客喺 Facebook 群組「車cam L（香港群組）」發文，笑話東鐵綫「阿叔食過夜粥」，仲配上週星馳《少林足球》經典插曲《少林功夫好嘢》歌詞，「少林功夫醒，少林功夫勁」。
網民對呢位「車廂師傅」反應兩極。一方覺得好過癮：「多啲呢啲片睇幾過癮，笑下幾得意，好過成日睇嘈交、睇MMA」；「其實可能係想做運動，但又想瞓多啲，所以爭取喺車途時間做啫」。亦有人笑佢「練緊神功，千祈唔好騷擾佢，等陣人哋走火入魔就大檸樂」。
另一方就憂心安全：「呢個大叔咁大動作打功夫，途人驚俾佢撞到，都唔敢行附近，阻住上落車」；「唔係任何地方都係你表演場地，咁做係騷擾到其他人，係自私行為」。有人更提點：「做晨操就去公園啦」。
《港鐵附例》第25條規定，任何人不得喺列車或鐵路處所對其他乘客造成滋擾或煩擾，違者最高罰款5,000元。
姣姐講多句： 阿叔你想養生，公園、屋村涼亭大把位，唔使搶人車門前。東鐵綫真係幾鐘頭車，你坐低做氣功都得，但千祈唔好喺站台上「一躍而起」玩命，真係撞到人有事，你唔單止要負上法律責任，仲要賠一筆。
