ViuTV全新團綜《MIRROR ACE》10月12日起逢星期一至五晚上10時30分播出，節目透過任務、遊戲同挑戰，呈現MIRROR 12位成員嘅ACE定位同「One and All」團隊精神。首集安排12子走進小學校園，限時20分鐘內要盡力俘虜小朋友手上的「心」，搞盡腦汁去令小朋友成為粉絲。
姜濤嘅策略簡單直接——美食。佢向小朋友高呼：「或者有人主動肯畀心我嘅，每人lunch time一個漢堡包食！」隨後數十名小朋友抵擋不住漢堡包嘅誘惑，一直緊緊跟隨佢嘅步伐。姜濤搖身一變成為小學生首領：「我叫姜濤！我哋依度係濤Team！有無人想join我地team嘅？知唔知join我地team會有啲咩野？漢堡包right？」小朋友圍住佢吶喊叫好，場面非常搞笑。
楊樂文（Lokman）眼見濤Team人多勢眾，笑言：「好疊馬喎！果然係銅鑼灣揸fit人啊！」
同姜濤嘅「食餌路線」相反，陳卓賢（Ian）走硬捱式。佢陪小朋友數足20個足球員名字，再表演跳舞同清唱《正式開始》，温柔大方俘虜咗唔少小朋友嘅「心」。
呂爵安（Edan）開場就表態對藍隊隊友陳卓賢同姜濤有信心，仲補充：「同埋我對自己都好有信心，知唔知點解？因為啲小朋友好多都有睇《膠戰》。」
除此之外，其他MIRROR成員都各出奇招，鬥快跑步、射籃球、一字馬、側手翻、掌上壓、拱橋樣樣做齊。累透嘅陳瑞輝（Frankie）感嘆：「依家啲小朋友唔同我以前，真係非常之非常之需要心機同耐性去征服佢。」
姣姐講多句：12大男人入小學校園，最後係漢堡包贏走足，同埋20個足球員名字。呢種「賣場員」戲碼，真係比任何舞台表演都令人難忘。
黃姣姐整合｜頂硬上
