MIRROR全新團綜《MIRROR ACE》下週一（12日）開播。昨日（4日），成員AK江𤒹生、姜濤、陳卓賢（Ian）、盧瀚霆（Anson Lo）、呂爵安（Edan）、柳應廷（Jer）、李駿傑（Jeremy）、邱士縉（Stanley）、邱傲然（Tiger）及陳瑞輝（Frankie）共10人穿團服齊齊出席記者會，3層商場早已塞爆fans；隊長楊樂文（Lokman）及王智德（Alton）因工作缺席。
最鬧嘅係隊友互投「ACE」封號環節。姜濤獲選「好勝ACE」，Tiger率先爆料：「佢一有球類活動，就會變身，好勝心就出嚟。」姜濤解釋同籃球有關：「贏唔贏都唔緊要，想盡力。」佢更自爆為咗1,000元獎金，足足追住節目組跑咗三日，Stanley順手補刀：「愈有錢嘅人，就愈想要多啲錢。」
Ian高票當選「策略ACE」，Stanley形容佢「用最少嘅力氣去達到最大功效」，Edan票數稍遜，謙言「佢係大智慧，我係小聰明啫」。「蠱惑ACE」Edan就眾望所歸，Jer爆佢「明明喺淘汰區，但係要出嚟搞下事，影響大局，最尾輸咗都有錢攞」，AK話Jer已有辦法破解。
全場最勁係Jer獲一致投選「口是心非ACE」。Edan急不及待爆料，指佢「唔食又食」：有次收工約Jer、Anson Lo、Stanley同Jeremy打邊爐，Jer起初推説好攰、想減肥，被説服後狂點「午餐肉、蝦餅、黑毛豬、肥牛……最尾自己食最多」。Anson Lo即為Jer改名「Vivienne」，源於劇集《老表，你好Hea！》陳嘉佳（細細粒）所飾角色，口裡説不，身體卻很誠實。主持沈殷怡要求「Vivienne Lau」以可愛驕俏模樣介紹團綜，Jer全程頻呼尷尬，説畢即靠在Edan膊頭上；Edan仲笑爆：「人哋叫細細粒，你就大大粒。」
圍爐環節按節目規則，Ian要用30秒讚姜濤，但佢喺活動上即席示範，只用咗10秒就講完，讚佢「好有個人想法」「好有義氣又好照顧身邊的人」；姜濤被要求「禮尚往來」，以30秒讚美「回禮」，話Ian「好聰明，但聰明得嚟都會配合大家……仲識作曲填詞」。
最後姜濤透露近日成為狗主，稱會親自放狗但保持低調，「希望大家畀啲空間我哋，盡量唔好影相」，仲話有請教AK同Ian，「我當佢係我個仔咁，希望佢健康成長」。
姣姐講多句：千蚊獎金追人三日，係呢個年代最誠實嘅好勝心；「口是心非」四個字喺打邊爐枱前有代價，Jer你學乖啲。Vivienne Lau，記住自己嘅定位。
黃姣姐整合｜頂硬上
