無綫視帝陳山聰一向吸金力強，工作接個不停。日前佢喺社交平台 Instagram 貼出工作點滴，公開感謝圈中金牌司儀阿Bob（林盛斌）再次帶埋佢出外「賺外快」接 job，寫道：「感謝我依位兄弟又帶埋我去撈野，我相信全港嘅男主持最有自信着衫嗰個一定係你🤣🤣🤣」。兩人兄弟情深之餘，字裡行間亦不忘互窒一番。
豈料呢個貼文一出，竟「點炸」咗另一位視帝馬國明。近年工作量極大、一向低調嘅馬明，竟然罕有主動喺貼文下留言「幾時預埋我……😎😎😎」，公開向阿Bob同陳山聰「𢱑工作」。陳山聰見狀立即幽默反擊：「靚仔你而家開演唱會㗎，點預你呀😆」，惹起大批網民圍觀點讚。
點解一向唔肯放低姿態嘅視帝會出聲？事實係，馬國明與湯洛雯（靚湯）結婚後，要獨力承擔照顧兩個家庭嘅龐大日常開支，責任非輕，佢一向勤力來者不拒、密密接工作吸金。然而劇集方面，隨住《夫妻的博弈》播畢，佢手上罕見地冇任何已拍畢嘅劇集存貨，暫時亦冇新劇開拍——就係因為這個「空窗」，先至逼到佢要親自出馬留言「𢱑撈」。
視帝都冇得揀，有幾日都係要食飯。呢單「明星公開𢱑工」嘅劇，演得比乜劇集都真實。
姣姐講多句： 視帝都冇得揀，市道差到連「金視帝」都冇劇集存貨，呢個先至係最真實嘅「市道報告」。網民笑馬明「開演唱會」，但真係冇工開，開乜都係好。視帝都難倖免開天窗，你問我都會笑住問：「幾時預埋我……」
