1892年3月17日，美國羅德島栗樹嶺墓園，幾個男人挖開咗一副棺材。入面躺緊一個19歲少女，死咗差唔多兩個月，遺體保存得好完整，切開心臟仲有血。村民即刻信誓旦旦：佢係吸血鬼，喺棺材度吸哥哥嘅命。
故事要倒返1883年。埃克塞特鎮農夫喬治布朗（George Brown），同妻子、7個仔女一起捱住肺結核（當地人稱「癆病」）。1883年12月，妻子瑪麗病逝；半年後20歲長女瑪麗奧莉芙亦離開——就係嗰個生前係裁縫、深受鄰里鍾意嘅長女，大批鎮民出齊送佢最後一程。幾年後，留喺老屋嘅19歲幼女梅茜（Mercy Lena Brown）1892年1月17日病逝。
同一陣時，曾去科羅拉多療養嘅哥哥埃德温病得連床都出唔到，病中一直喊「她來了」、「她想我跟她走」、「她一直纏着我」。呢段話傳落小鎮，新英格蘭鄉下嘅舊迷信即刻啟動：癆病死人會喺墳頭吸取活人生命。村民逼喬治開棺，揾出嗰個「吸血鬼」，燒咗佢嘅心。
3月17日，村民帶住醫生哈羅德梅特卡夫（Harold Metcalf）同《Providence Journal》記者到場。先開出瑪麗同長女，屍體早腐化到只剩白骨——唔計。目光落喺梅茜嗰副棺材，遺體好完整，心臟切開有血。村民狂喜。
資料圖片：Pixabay
醫生話，嗰啲係凝固分解嘅舊血，冬季低温令腐化慢，肺部檢出肺結核病變，一切都有醫學解釋。村民聽唔入耳，照樣喺墓邊石頭生火，將梅茜心臟同肝臟燒成灰。據流傳，埃德温飲過混住呢啲灰嘅水。
冇用。1892年5月2日，埃德温亦死咗。其後，布朗家7個仔女，除咗Hattie May，其餘6個全部先後因肺結核病逝，分別係1895年嘅Annie Laura（25歲）、Jennie Adeline（18歲）同1899年嘅Myra Frances（18歲）。喬治活到1922年。
19世紀缺乏有效抗結核藥，病喺空氣傳播，一家人輪流感染唔係玄學。研究新英格蘭吸血鬼民俗嘅學者Michael E. Bell指出，18至19世紀當地出現過多宗類似開棺焚心事件，梅茜係其中最著名、紀錄最完整嘅一宗。
佢埋身之前，縫緊一張被褥。
黃姣姐整合｜頂硬上
