妹頭（盧頌恩）近日開演咗人生首套舞台劇《辦公室劇后》，前晚（23日）完咗第一場，以為平安過岸，點知「死亡第二場」真係唔信唔得——24日開第二場前，佢突然急性失聲，喺社交平台落淚拍片，聲線虛弱沙啞：「今日第二日開show，但係我把聲突然之間急性失咗，冇咗把聲。而家好驚……」
最荒誕嘅係，佢即場衝去打「開聲針」，仲有醫生話幫佢打支「最勁」嘅。點知呢支針未夠時發揮功效，等開場時聲返都未返到，佢就只好用「米奇老鼠咁」嘅沙啞聲撐完第二場，事後喺網上「報平安」，先向買飛入場嘅觀眾道歉：「第二場米奇老鼠咁失聲演出，實在十分抱歉。」
佢又話最驚嘅唔係自己癲，係「驚對唔住買左飛入場睇嘅觀眾朋友，同影響個戲」。演出完佢感謝大量圈中好友同網民喺留言祝福氣，仲有人齊心齊力出招，獻議飲管吹水泡、吸蒸氣、飲鹽水、食清音丸、飲柑桔檸檬「揾返把聲」。
「感受到超級嘅愛意同支持，最後係急症打咗嘅強效開聲針未有及時發揮功效，而呢一刻最有效既方法，我諗只有訓教。求集氣，聽日開番聲，我要繼續做可惡既 Melody!!」佢話。
姣姐講多句：「開聲」呢樣技能，竟然真係有「罷工」咁一説。做舞台劇人成日講「死亡第二場」，今次真係應驗，但佢唔逃場、唔取消，硬生生撐完全場先道歉，呢種執着係專業人嘅底線。聲帶罷工嘅時侯，冇乜偏方比訓好更有用，大家都學乖啦：開場前幾日，少食凍嘢、少熬夜、少喊，聲帶同你一樣，都要休息。
（成人話題｜18+）
