已故天后梅艷芳嘅骨灰，供奉喺大嶼山寶蓮禪寺海會塔。今年7月，有歌迷前嚟拜祭時察覺骨灰不翼而飛，梅家人得知後即時報警，惟案件自此冇實質進展。10月10日，即梅姐63歲冥壽當天，梅艷芳國際歌迷會發聲明，正式揭發呢件事。

資深電影人及編劇文雋，18日喺自己嘅個人YouTube頻道透露，收到梅艷芳歌迷組織「芳心薈」會長Eva傳來嘅一段影片。影片中稱，警方經地氈式排查，從一段模糊嘅旅遊巴行車記錄影像入手，經專家用高科技修復同分析後，發現7月上旬某個早上，有一名身穿寺廟清潔工制服、帶編號嘅人士離開海會塔，形跡可疑走入後山樹林。查出勤記錄後，佢被指名為「阿強」，而且在事發後不久已離職、離港飛往東南亞。

不過，相關説法目前僅為文雋單方面發布。警方至今未對外公開任何案情進展，梅家人同警方都冇公開證實「阿強」其人。資深傳媒人潘小文18日傍晚轉載梅艷芳國際歌迷會早前嘅聲明，指除咗案件喺10月12日轉交新界南重案組接手之外，並無其他進展，呼籲大家唔好揣測係邊啲人做嘅。

姣姐講多句

呢單事最尷尬嘅係文雋。一個寫嘢為生嘅資深編劇，最清楚一字一句嘅分量，未經查證就將一條未經證實嘅「破案片」當真引用，事主遺族嘅痛，唔應該成為流量嘅材料。呢單事提醒我哋：畫面再「似乜都似」，都唔代表真；查證呢兩字，唔可以因為「聽上去好真」就省略。

黃姣姐整合｜頂硬上