已故樂壇天后梅艷芳（阿梅）喺大嶼山寶蓮寺海會塔嘅骨灰，早前驚傳不翼而飛，至今三個月仍未破案。呢宗牽動全港歌迷心嘅案件，近日卻被一場AI謠言風波再推上浪頭。
資深電影人文雋日前喺個人YouTube頻道發布影片，稱收到梅姐另一歌迷會「芳心薈」會長Eva分享嘅片，並喺節目上覆述：警方已鎖定嫌疑人，且對方已潛逃東南亞，案件取得「突破性進展」。消息一出，隨即引起廣泛關注。
然而有關消息隨後被揭發，根本源自網上流傳嘅「AI虛假片段」，並非警方確認嘅事實。文雋事後承認自己未做事實查核（fact check）便播出，並對發放未經證實消息深表歉意。
獲梅家家屬認可嘅「梅艷芳國際歌迷會」即發嚴正聲明，對這類具誤導性資訊表示「極度憤怒、荒謬至極」。聲明指出：「對於這種不負責任、胡亂揣測甚至造謠的行為，我們感到極度憤怒，並覺得此事荒謬至極！這不僅對死者極不尊重，更對家屬和真正愛護梅姐的歌迷造成二次傷害。」
歌迷會重申，所有本案真實、確切嘅最新消息，一律只會由「梅艷芳國際歌迷會」同梅小姐之子姪發表聯合署名公告為準；任何所謂「內幕」，均不代表官方立場。歌迷會同時表明，對蓄意造謠、誤導公眾、消費死者嘅行為「絕不姑息，並定必保留追究一切法律責任嘅權利」。
姣姐講多句
呢單事最傷嘅地方，唔係有邊個搞AI片，而係當個片一出，仲有人信、仲有人播、仲有人當實錘。梅姐走咗，但佢嘅名字仲被當流量用。AI再強，都唔該做呢種嘢。
黃姣姐整合｜頂硬上
