澳門一間老牌粵菜館，一道59元粉絲節瓜蝦米煲端上枱，材料幾乎全浸喺一海「穊撻撻」湯汁入面，食客拍低片段貼網，即遭網民狂嘲「仲以為係碗仔翅」。
有網民喺 facebook 群組「香港茶餐廳及美食關注組」分享，話喺澳門一間老牌粵菜館光顧，點了要價59元的粉絲節瓜蝦米煲。點知碟菜上枱，所有材料幾乎被湯汁完全蓋住，用匙羹攪拌、嘗試撈起材料時，湯汁呈「穊撻撻」狀態，估計係生粉芡過重，或粉絲燜爛吸乾水分，同理應清爽、有層次感嘅賣相完全唔同。
食客隨即找店員查問「粉絲節瓜煲係咁嘅咩？」，對方只解釋「水落多咗」便離開。二次反映，另一員工先上前表示「幫你退」，食客大為不滿：「梗係退啦！」事後將影片貼上網公審。
貼出即引來網民嘩然，批評餐館出品「不知所謂」，有人調侃「仲以為係碗仔翅，用煲仔上咁新穎」、「呢個係羹嚟喎」、「（咁似）上一枱食剩嘅」，亦有「睇見都唔想食」、「咁都可以上枱」、「你唔講真係唔知呢煲咩嚟」。
姣姐講多句：「水落多咗」就照放上桌，二次反映先退單，呢個唔係廚房失誤，係廚房失憶。賣相係菜式嘅臉，羹汁成海仲當煲仔賣，想食好嘢嘅朋友，呢個廚房建議列入黑名單。
