話開玩笑，呢個真係發生喺倫敦嘅事：一間餐廳開咗，全場淨係賣一樣嘢——薯條。
間店叫 CHIP，坐落喺 London Fields 嘅 2 Westgate Street，由 11 月 5 日至 8 日開四日，每日 11:30am 到 7:00pm，全場免費。冇前菜主菜嘅分別，就係薯條，唔同味位、唔同淋醬嘅薯條。好似茶餐廳開咗間專門賣蛋治嘅分店，聽落荒誕，但真係開咗。
個招牌菜係英國 daytime TV 女主持 Alison Hammond 同 McCain 一齊搞嘅，名叫「The National Treasure」，配搭係蒜蓉牛油、辣蜜同 Everything Bagel seasoning。菜名起咗個「國寶」，擺明將薯條捧到國寶級。
菜單入面仲有幾款名堂：「Pomme de Terre」係 90 年代風格，白松露油加牛肝菌粉同迷迭香海鹽；「Fall Fries」被形容做「千禧世代嘅秋日夢」，南瓜香料配鹹焦糖同肉桂糖；「Po-TEA-to」係日式風，抹茶、味噌同柚子；「Chip-kle」就係酸醃菜醋加蒜蓉牛油同粉紅岩鹽。名都起得用心，擺明係想人拍照上 TikTok。
圖片：Marcus Liversedge／CC BY 3.0／Wikimedia Commons
Alison 自己講：「我煮嘢可能攞唔到獎，但講到落薯條，我識我嘢。」呢句自嘲寫到幾貼地。佢又話歡迎人嚟「試一條你從未試過嘅薯條」。
McCain 市場總監 Laura Koscik 講，佢哋係全球每四件薯條之一嘅製造商，今次就係將薯條擺到舞台中央。
硬蕉抽兩句：一間餐廳開四日淨係落一樣嘢，仲請咗個名人搞簽名碟——呢個係認真做一件荒謬嘅事，冇乜深意，就係想人記得。免費食，London Fields 嗰邊，好，唔使你諗。
硬蕉哥整合｜頂硬上
