33歲西班牙女門將加拉多（Lola Gallardo），近日宣佈會進駐以成人付費內容聞名嘅訂閲平台OnlyFans。消息一出，迅速喺體育圈同社交平台掀起熱議。
加拉多呢個名，球迷未必人人熟，但佢係實打實拿過歐聯冠軍嘅西班牙門將。佢喺2019至2020球季曾短暫效力法甲勁旅里昂女足，並隨隊攞下歐洲女子冠軍聯賽冠軍，而家則喺馬德里競技女足出戰。消息曝光之後，佢過往喺社交平台分享過嘅性感藝術照，都再度受到關注。
加拉多私人生活亦踏入新階段：佢喺2025年同自己嘅同性妻子結婚，兩人正準備迎接第一個孩子。佢話，就係喺事業同家庭都轉軌嘅時候，決定開個帳户，多一個平台同球迷分享生活。
佢喺個人社交平台寫道，女子足球近年獲得「前所未有」嘅關注，佢希望透過唔同平台，令球迷可以陪伴佢度過成個球季，亦深入瞭解「真實生活入面嘅自己」。佢透露將來會分享球迷平時較少見到嘅一面，包括日常訓練、生活點滴、迎接孩子出生嘅過程，以及個人同職業生涯入面嘅珍貴時刻。
其實講到女運動員進駐呢類訂閲平台，加拉多並唔係頭一個。綜合格鬥選手佩奇（Paige VanZant）、短道速滑嘅克里斯蒂（Elise Christie），以及奧運撐竿跳銅牌得主紐曼（Alysha Newman），過往都曾經透過相關平台分享個人內容，同粉絲增加互動。
硬蕉抽兩句：門將嘅本職就係守住個門，而家佢決定再開一扇門，俾人睇球場之外嘅自己。成年人自己揀嘅平台、自己嘅生活，想點分享係佢嘅自由。真係要「硬」，應該對威權同審查硬，唔好對人哋揀邊個社交平台發嘢硬。
硬蕉哥整合｜頂硬上
