80歲的羅家英近日上咗 YouTube 頻道《smartlegalhk 法識學堂》接受訪問，喺鏡頭前面對幾十年抗癌路，由頭至尾講清自己點樣同病魔交手，仲順帶分享咗佢嘅「處世三招」。佢講出嘅第一句，係講2004年首次確診肝癌嗰陣：「我係驚嘅。」

最令人心酸嘅一段，係佢當時點樣瞞住母親。羅家英自述，佢切咗一部分肝，但為咗唔想阿媽擔心，佢對佢講嘅係「我十二指腸出血呀」，因為佢阿媽自己都試過十二指腸出血，聽完鬆咗口氣。「其實我係切咗一部分肝。講十二指腸就係唔想佢擔心。」佢話，而家佢阿媽都知咗真兇，但「結果我都冇事，佢都冇事啦」。

羅家英話，佢後來靠誦讀《心經》慢慢想通，覺得「遲早都會有嗰一日」，唔需要再驚。

早前佢披露前列腺癌復發，現月花約一萬元醫藥費，只靠藥物控制病情，並已表明拒絕化療同電療。訪問中佢主動提問政府嘅「預設醫療指示」有冇涵蓋安樂死，話「病到最後關頭只想走得舒服瀟灑」。佢仲強調最重要係有積蓄：「最要緊係你自己有積蓄，唔好臨過世冇錢……唔好同人借錢，前無債主，多好！」

佢嘅「處世三招」，佢話係幾十年嘅體會。第一招係要識得「懶」，份內事做完即止，唔好內耗過勞，亦唔好易發火。第二招係凡事只做六至七成，運動工作都切忌過量，佢話老人家行路每日大約五千步就夠。第三招係心態樂觀、「天塌下來當被蓋」，唔好嫉妒、挑剔、記仇，問心無愧過好每一日。

佢八十歲，經歷咗幾度患癌，今次呢個訪問，比起任何「奇蹟抗癌」嘅標題黨，多咗一份真實同誠意。

黃姣姐整合｜頂硬上