74歲嘅金像、金馬雙料影帝李修賢，近日接受資深傳媒人汪曼玲專訪，再次大爆同周星馳超過三十載嘅舊怨。呢次佢話到咬牙切齒，一口咬定星爺從來都冇視佢為貴人，「佢當我係傻嘅」，更直言到拍《龍的傳人》嗰陣，「我已經唔去現場，我直頭係放棄呢個人」。
事情源於李修賢早前喺社交平台開直播，公開批周星馳「無兒無女無家庭」，引來兩岸三地網民集體圍剿。事後佢拍片公開道歉、自封「被罵冠軍」，但通篇冇一句向星爺認錯，令兩人嘅積怨再浮面。
今次受訪，李修賢更爆出1988年《霹靂先鋒》嘅選角秘辛：原本第一首選係梁朝偉，但檔期排唔開；第二人選係王書麒，可惜佢同經理人「獅子開大口」，開出30萬片酬令合作告吹。佢話喺別無選擇之下，先留意到當時仍係TVB演員嘅周星馳，並力排眾議，頂住電影公司同幕後團隊嘅反對，起用星爺做男配角。
佢更透露，為幫星爺轉戰大銀幕，佢親自同TVB高層周旋搞定經理人合約；星爺憑《霹靂先鋒》奪金馬最佳男配角後，態度卻180度轉變，「合作第二部戲就已經搞佢唔掂」。李修賢話佢睇過星爺同幾大導演合作，「已經係搞佢唔掂，我就更加知道我管唔住佢」。
回想星爺未紅之前，李修賢話對方其實守時、工作認真，但主見極強，「佢好清楚自己想要啲乜嘢」。
姣姐講多句：老拍檔鬧到呢個程度，仲話「放棄」，真係聽落都心酸。
黃姣姐整合｜頂硬上
