李光洙10月1日正式開通付費粉絲交流平台Bubble，頭一日就「中毒」咗，同粉絲傾到冇完冇止。《Running Man》嗰種搞笑又親切嘅聊天功力，一搬到私域社交平台，整部韓國演藝圈都畀佢拉埋晒。
呢波「熱暴力」最勁嘅，係佢真係可以將人暖到眼眶紅。有高三粉絲留言「我現在超不安」，佢回「知道了，我今天會為你祈禱」，六個鐘頭之後仲真係晒出親筆寫下嘅祈禱內容。另一段連環對白更係暖到炸：有人撒嬌「歐巴也照顧一下大學生嘛」，佢答「你現在是高三生的夢想」；有粉絲抱怨「不想上班，怎麼辦」，佢回「你現在是大學生們的夢想」；再問「那求職生呢？」，佢神回「你是沒有夢想的人的夢想」；最後問「那沒夢想的人呢？」，佢寫「不管什麼夢想都能擁有，什麼都能成為的人」。最温柔嘅，係佢分享一盆四個月都冇開花嘅盆栽，話「就算沒有花，它光是存在本身就很漂亮、很可愛了」，被粉絲大讚係詩人等級。
消息傳開後，IVE嘅Rei、Liz，RESCENE嘅Liv、Woni，tripleS嘅尹舒妍，KISS OF LIFE嘅Haneul，LUCY嘅崔庠燁，李泳知等歌手都開口提到佢嘅Bubble，有人仲直接曬訂閲認證，甚至有偶像被激到，乾脆更積極同自家粉絲互動。
最大笑點來自佢嘅好兄弟。金宇彬喺自己嘅Weverse公開喊冤：「我現在超混亂。不是啊，我們拍攝現場也因為光洙哥的Bubble亂成一團。拜託誰去叫他停一下，工作人員都沒辦法專心拍攝了啦！」EXO嘅D.O.喺演唱會上亦冇放過佢，吐槽「光洙哥居然開Bubble，我根本不知道他開始了……像瘋了一樣」，末句仲補刀：「不過睡覺的時候把人吵醒就有點……現在立刻叫人起床是怎樣？」
姣姐講多句，Bubble呢類付費平台早已經係韓星同粉絲之間嘅標配，但李光洙呢波真係「反殺」——以為係搞笑訂閲，最後畀佢暖到，甚至有人笑言「終於懂李先彬為什麼跟他交往9年了」。金宇彬喊到要人叫佢停，D.O.喺演唱會上補刀，呢個就係韓星「熱暴力」嘅真實寫照。
黃姣姐整合｜頂硬上
