現年80歲嘅家英哥（羅家英），早前公開自揭自己嘅癌病再次復發，而呢次，係佢第4度同癌魔交鋒。難得嘅係，面對呢個關口，佢冇選擇化療，而係堅持北上同班老友打波，仲親自揸車帶路，精神頭仲係足。
片段喺《香港明星足球隊》嘅抖音帳號上公開。黃日華喺路邊突擊行近家英哥嘅座駕，笑問佢點解仲要自己揸車。家英哥即刻眉飛色舞，話自己揸車鍾意去邊就嚟邊，「同時呢……可以車靚女」。黃日華一聽到「靚女」二字，即刻探頭睇後座，原來位「靚女」正正係同樣資深嘅老拍檔海倫姐（馬海倫）。海倫姐喺後座笑笑口應承，黃日華驚喜大叫「Helen姐」，家英哥喺司機位笑到見牙唔見眼。
玩笑講完，黃日華認真追問呢位80歲老人家點解仲要親自揸車。家英哥打趣否認係因為「有錢買車」，反而話自己「好眼力」，駕駛係一門需要高度集中、眼力同判斷力嘅學問，對佢嚟講就係最好嘅腦力訓練，保持反應敏捷，絕不認老。黃日華聽完不忘叮囑佢小心揸車，家英哥搞笑回應：「我跟住你……你哋唔好走咁快，睇住我啊。」
鏡頭前嘅家英哥雖然精靈活潑，但背後嘅抗癌路確實唔輕鬆。佢喺2004年同2014年先後確診肝癌，2019年又確診前列腺癌，而近期面臨第4度復發。面對呢次難關，佢選擇放棄辛苦嘅化療同電療，改以服藥及注射女性荷爾蒙控制病情；據醫生評估，佢嘅餘命約為8至9年。佢亦坦率承認，切除前列腺後已失去性慾，多年來為抗癌耗費唔少積蓄，加上未買保險，經濟壓力唔輕。
幸好，佢身邊一直有愛妻汪明荃（阿姐）不離不棄，互相扶持。兩人抱持「求共存非消滅」嘅心態迎戰癌魔。
姣姐講多句
見到家英哥今日仲能開懷大笑、享受駕車樂趣，真係令人又感動又振奮。有人可能會問，點解一個癌患要拒絕治療？但每個成年人有權決定點樣面對自己嘅身體同生命。家英哥嘅選擇，係佢睇透生死之後，對自己生命質素嘅堅持。我哋可以做嘅，係尊重佢嘅自主，同埋為佢送上祝福。
黃姣姐整合｜頂硬上
