新城知訊台節目《放飯ICU》今集請到林愷鈴、張達倫，分享拍攝《地獄大狀》嘅最新故事。兩個人都係劇中核心，但準備方式一硬一快，各走極端。
林愷鈴喺劇中飾演氣場強大的大律師「邱蔭蔭」。佢笑言當初經歷咗多輪試鏡先攞到角色，決定喺開鏡前一個月開波做重訓，練肌肉、跑步，希望靠身體撐起角色嘅硬朗氣勢。佢話自己「採用 Outside In 嘅方式」，並自爆：「我本身好似麵條咁，唔做運動，但喺開鏡前一個月開始做重訓練肌肉同去跑步，想令自己有一種運動員嘅硬朗心態同線條。」由軟麵條練到有線條，呢個反差本身就係最大笑位。
問到做狀師嘅母親龔慈恩有冇傳授演戲秘訣，林愷鈴話媽媽今次反而少講，多係精神支持：「Mommy 叫我當去玩、唔好咁大壓力。」佢喺節目即興模仿媽媽語氣，維妙維肖，仲大讚媽媽非常前衞，睇得明行業現狀，母女而家好多工作話題。
張達倫離開 TVB 後電影電視雙線發展，話而家拍劇多由電影班底製作，風格貼心、電影感強，演員唔使刻意放大表情。但佢亦爆過一個極高難度挑戰：劇組為省成本租法庭景，佢要同時拍《地獄大狀》同另一部法庭劇《Court》。「因為要計數，所以兩套戲黐住個法庭景一齊拍！攞到劇本時間短，啲法律對白又多，拍完《地獄大狀》即刻拍另一套，過程真係好變態，但拍完覺得自己升咗 Level。」
劇中佢哋師徒之間發展出爭議感情線，林愷鈴直言「邱蔭蔭」對師父係真愛：「係佢人生中為數不多嘅真愛，唔可以用錢衡量。」張達倫話劇出街後觀眾反應正面，角色互相做「精神避難所」嘅設定貼近現實。另外佢育有 9 歲兒子，話不刻意嚴厲，「依家個年代唔同咗，你嚴都冇意思，佢都唔會驚你」，遇到教育問題會上網揾方法，多給陪伴同擁抱。
姣姐講多句：拍戲拍到要由麵條練到運動員、仲要同一個法庭景連背兩套法律對白，呢啲就係所謂「犧牲精神」嘅實錘。麵條梗係要練先有型，練完先至頂硬上。
